بقلم / مياده محمد
الفرصه الفرصه بنت جميله راكبه عجله ببدال …..لوراحت مبترجعشى دى شقيه وليها دللها …. حلمك لو يوم يلمسها تديك اكتر ما بتحلم …الفرصه بتعرف ناسها واللى بتفوته بيندم
احنا موضوعنا انهارده عن البنت الجميله …احنا موضوعنا انهارده عن الفرصه … الفرصه حلم لكتير مننا …الفرصه طوق نجاه بندور عليه كلنا عشان نرسى على بر الامان …..مين فينا مدورش على فرصه عشان يشتغل فى الوظيفه اللى بيحبها …مين فينا ما حلمش بفرصه عشان يحقق احلامه واهدافه اللى عمرها ما فارقته …كام واحد فينا غمض عينيه قبل ما ينام وعاش فى حلمه اللى مستنى تحققهولو الفرصه …..مفيش شك ان الفرصه بتلعب دور كبير جدا فى حياه كل واحد …بس سؤالى انهارده …ايه اللى بيخلى الفرصه تعرف طريق حلمك …يعنى بطريق تانيه الحظ هو اللى بيلعب دور فى ان الفرصه تجيلك …ولا شطارتك واجتهادك هو اللى بيخلى الفرص متاحه قدامك ….الحظ ولا الشطاره سؤال بيطرح نفسه لما نيجى نتكلم عن الفرصه …..ده يمكن كمان مش الحظ والشطاره بس اللى ممكن تساعد ان الفرصه تعرف طريق حلمك ده الوساطه والفلوس برده ممكن يلعبوا دور كبير فى زياده عدد الفرص اللى ممكن تقابلك …. وهل يعنى من العدل ان الواحد يوصل لمجرد انه معاه فلوس او واسطه او حتى ان حظه حلو ..وواحد تانى هارى نفسه كورسات فى مجاله والاول على دفعته ومعندوش فرصه للاسف لمجرد انه ملوش ضهر ….بصراحه موضوع تكافؤ الفرص ده حاجه كده زى افلام الخيال العلمى من وجه نظرى …مع انه موضوع مهم جدا وهيحل كتير من مشاكلنا لان ببساطه جدا ان العدل اساس الملك …طبعا الدوله ليها دور فى تحقيق العدل بسن القوانين الصارمه تجاه كل واحد بيتجاوز ويستخدم سلطته ونفوذه وياخد حق مش حقه …لكن انت كمان ليك دور … اوعى تاخد حق مش حقك..ولا تدى حد فرصه مش من حقه … …اوعى تقبل انك تشغل ابنك معيد فى الجامعه وفى واحد تانى طالع الاول ع الدفعه …اوعى تقبل انك ترقى جوز بنتك فى الشغل عشان مرتبه يزيد وبنتك تتبسط وفى اللى احق منه بالترقيه دى …اوعى تقبل ..اوعى تقبل
لو رفضت الظلم هييتحقق العدل ويحصل توازن وتكافؤ فى الفرص اللى ممكن تيجى لكل واحد عشان يحقق بيها حلمه …وتلاقى البنت الجميله بتخبط على بابك وتقولك ….افتحلى عندك فرصه …
