بقلم : وفاء يوسف
يا فاتحة دراعاتك ع البراح وفي وشي قافلاها
بتداوي جراح غيري و جراحي فايتاها
جرح الغربة كان قاسي
علم لي في راسي
و سيل الدمع كيف أداريه ؟!!!
يا اول حب حبيته و ليه معنى
شرح الوفا معانيه
سارقاني الغربة من قلبك
و ها انكر ليه؟!
انا بعترفلك بتقصيري
بالحب اللي بينا و ما احتاج لتفسيرك و تفسيري
غير ،،،
إني أنا السمرا بنت النيل
واقفة على بابك بغنيلك
مدوبني الشقى و الليل
و في عز الجرح ما يسرسب
و يرمي في التراب دمي
مسامحاك و حبي كل يوم بيزيد
عمري ف لحظة عن حبك ما قلبي مال
دا انا نخلك و صفصافك
و عزف الروح في موالك
رصاصة في قلب الغدر لو داس على طرفك
أو طير في الهوا شالك
أنا عزك أنا ناسك أنا شمسك و حراسك
أنا الزاهدة في محرابك
فا افتحي قلبك و ضميني
و افتحي قلبي
هتلاقي صورتك فيه
