بقلم / وائل نصار نصر
الحياة لعبة كل ما كبرت كل ما روحت لمستوى اعلى واصعب .. والمشكلة اللي بجد انك تكبر في السن لكن بدون ما تتطور .. بنفس الفكر ونفس المعلومات وبكدا هتكون مش اد المستوى اللي انت فيه فهتلاقي اللاعيبه التانية بتلعب بيك
..
الحياة مش لعبة حلوة هتفضل تكسبها كل يوم ولا بركان هتقع فيه وتتحرق ألف مرة وتصبح رماد .. الحياة فيها الأثنين
..
حياتك طريق .. نقطة بداية ونقطة نهاية .. أتخيل نفسك كدا ببساطة ماشي في الشارع وباصص وراك .. هتتكعبل في كل حاجة قدامك حتي لو طوبة صغيرة .. وهتقع وتتوجع ومع تكرار وقعاتك طاقتك هتقل وهتنتهي .. لكن لو باصص قدامك ومركز هتعرف على الأقل تشوف ايه اللي داخل عليك ويبقي في مجال تفكر هتواجهه ازاي .. والطوب الصغير هيبقي حاجة هايفة ومش هتقف عليه
..
انكساراتك .. فشلك .. وقعاتك .. مش غباء منك لأ ده درس انت اتحطيت فيه علشان تتعلم حاجة معينة .. بص قدامك وكمل باللي اتعلمته
..
الناس كلها مهما كانت درجاتها وصفاتها عبارة عن مخلوق زيك .. متقلب المزاج .. هوائي .. عبارة عن مشاعر .. زيه زيك بالظبط .. فتخلي أفعالك وأهدافك لنفسك و تعمل اللي يرضي ربنا .. انت عمرك ما هتعجب كل الناس . وحتى لو عجبت ناس كتير هيبقى فترة اه وفترة لأ
…
العشم يكون في رضا ربك وبس .. هترفع العشم دا مع البشر هتقع على رقبتك وتنكسر .. وخلي سقف توقعاتك مع الناس في حدود إمكانياتهم
..
خليك في حياتك و أوعي تضعف وتشتكي لأنسان زيك لو غريب ومتعرفوش .. كلنا فينا مشاكل وبلاوي .. متدورش على حد غريب تحكيله .. الغريب مكسور زيك ولو كان قوي وعارف يحل مشكلته مكنش تاه زيك و دور علي حد يكلمه .. فكرة اتنين مكسورين يسندوا بعض دي فكرة فاشلة .. دور في الواقع على الناس الناجحة وخليهم مصدر إلهامك
..
أي خيط يتعبك اقطعه .. إياك والخوف .. واياك من السكوت تحت اي ظرف او حال .. اعرف ان كل يوم بيعدي على سكوتك بيبني طوبة بس للأسف بتتبني علي جدار قلبك وكتير منكم اكيد جرب السكوت لما بيوصل للانفجار … أو الصمت اللي بيوصل للإهمال واللامبالاه
..
ابعد خالص في كل علاقاتك عن الناس اللي دايما شاكة فيك .. شاكة ف كلامك وشاكة ف حركاتك وأسئلتهم كتيرة .. أنفاسك يا أبن الناس ليك وبأيد ربك مش بأيد عباده
..
. (( فطور من نفسك )) وطالما عايش فالفرصة لسه قدامك بس هتحتاج مجهود فابني نفسك علشان نفسك وخلي دايما في ذهنك ان الحياة محتاجة معافرة .
