لمن يهمه الأمر ,,, اللاعب الدولي محمد صلاح أمن قومي , أليس منكم رجل رشيد
نقلا عن أحد محبي مصر المدون . معتز مصطفي على صفحته بالفيس بوك
محمد صلاح في خطر!
واللي ما يعرفش لازم يعرف.
اللي هشرحه في البوست ده مش هيكون عارفه غير اللي متابعين كورة أوي ومصادر أخبارهم من النت، لكن باقي جمهور صلاح اللي هو الـ 100 مليون مصري ما يعرفوش حاجة.. والصحافة والتليفزيون والراديو مش عايزينه يعرف إلا بحدود.
القصة إن محمد صلاح في خلاف كبير مع ملوك الفهلوة المصريين في اتحاد الكورة المصري.. خلاف قد يصل لشكاوى رسمية ومنازعات قانونية قريب أوي.
إيه الموضوع؟
الموضوع إن محمد صلاح زي نجوم العالم بتمتلك حقوق استخدام صورته دعائيًا جهات معينة، شركة واخدة الحقوق دي جوه بريطانيا حصريًا.. وشركة تانية واخدة الخقوق في باقي دول العالم بما فيها مصر.
طبعًا كل ده بيديره ويتابعه وكيل محمد صلاح ومحاميه.. أحسن لاعب في أفريقيا وفي الدوري الإنجليزي مش فاضي لوجع الدماغ ده ولو فقد تركيزه يوم واحد بس ممكن كل اللي عمال يبنيه ويبهر الدنيا بيه وخلانا نفتخر بيه ده يتراجع في ثانية وسط منافسة شرسة ما بترحمش!
يقوم اتحاد الكورة المتسول بتاعنا بقيادة هاني أبو ريدة بطل صفر مونديال 2010 يعمل إيه؟
قرر إنه يدي حق مش بتاعه لشركة Presentation راعي الاتحاد المصري إنها تستخدم صورة محمد صلاح على الطيارة اللي هيسافر بيها المنتخب لكاس العالم وعليها شعار كبير للمصرية للاتصالات “WE” وباقي الرعاة اللي مشاركين في حقوق الرعاية مع بريزينتيشن (ده بعيدًا بقى عن التصميم الزبالة أصلًا للطيارة لكن دي قصة تانية)
ماشي.. هنقول غباء معتاد وتناحة واستنطاع ويا صابت يا خابت
فكان طبيعي الشركات اللي بتمتلك حق استخدام صورة محمد صلاح تزعل.. وبالتبعية صلاح هيزعل وممكن يتعرض لغرامات من الشركات دي..
فاتحرك وكيله وبعت أكتر من خطاب رسمي لاتحاد الكورة بيقولهم غلط كده يا جماعة.. ما يصحش .. عيب!
يقوم هاني أبو ريدة يعمل إيه؟ يرد بخطاب رسمي يعتذر؟ لأ
طيب يرد يوضح؟ لأ
طيب يرد يقول ده اللي عندنا حتى؟ لأ برضو
راح اتصل بمحمد صلاح يقوله ما تشوف وكيلك يا كابتن وكل سنة وانت طيب وربنا يخليك لينا
طبعًا أبو ريدة ما قالش كده بالنص.. بس الاتصال حصل بجد وانا مش لاقيله وصف غير كده الحقيقة.. ربنا يخليك لينا يا باشا 
وكيل صلاح بعت خطاب رسمي جديد بيقولهم بتكلموا صلاح ليه؟ صلاح مش شريك في الشركة صاحبة الحقوق ومالوش سلطة ويا ريت ماحدش يكلمه تاني ويبقى الكلام رسمي.
صلاح نزل تويت بيعلن فيها دعمه لوكيله
يقوم سيف زاهر عضو اتحاد الكورة يرد على التويت يقوله ما معناه: طيب خليها بيننا وبين بعض مش على الملأ كده يا ابو صلاح ههههههه (قمة السماجة وعدم الاحترافية وقلة الأدب)
الموضوع فيه تفاصيل تانية لكن منعًا للتطويل هي دي القصة وأهم أحداثها.
ليه بقى صلاح في خطر؟
مش عشان الغرامات والضرر اللي ممكن يلحق بيه بسبب موضوع الرعاية.. إن شاء الله ده هيتلحق..
المشكلة في كم التشتيت والقرف اللي بيتعرضله من شوية الهواة الباحثين عن السبوبة.. المشكلة في الإعلاميين اللي لولا إن صلاح في القمة وماعندناش غيره في المنتخب دلوقتي كانوا دبحوه بكل راحة ضمير لأنهم جزء من دايرة السبوبة الكبيرة في الكورة في مصر.
وده مش افتراض.. هو ليه بوادر على أرض الواقع فعلًا زي مثلًا إن شوبير بيقود نغمة ملخصها: مصر ليها فضل على صلاح ولازم ناخد حتة من التورتة.
صلاح في خطر .
