كتب:عبدالرحمن مؤمن عبدالحليم
أهلا بيكم أعزائى القراء والقارئات الافاضل
-الحقيقية موضوع اليوم من الموضوعات الهامة جدا اللى أتناقشت كتير ولكن أحنا عاوزين نقدم حلول تتنفذ على أرض الواقع سوا وعشان كدا فضلت إنى أتكلم بالعامية فى الموضوع دا بالذات لانه هتكون زى دردشة أصحاب مع بعض حابيين يكون إيجابيين طبعا سامعكم بتقولوا ما تقول الموضوع إيه حاضر هقولكم حالا موضوعنا اليوم عن الصداقة الحقيقية اللى بنفتقدها بقالنا سنين ومن جوانا نفسنا نلاقيها لان الصديق الحقيقى أصبح عملة نادرة جدا لا تشترى بملايين الجنيهات ولا بملاليمها دى بتجى بحسن أختيار الاصدقاء اللى بيحبوا بجد الخير للناس اللى معندهمش أنانية جواهم –
اللى يساعدوك على الخير وينصحوك بتجنب الشر اللى يضر صحتك أو مجتمعك أو يكون فيه غضب ربك عليك – اللى يحبوك عشان شخصك مع عشان مصلحة معينة وبعد ما تم متلقيش حد منهم – اللى يكون معاك صريح ويهديلك عيوبك مش يضحك عليك ويوهمك أنك صح فى أمر غلط مثلا تلاقى واحد حاسس أن عنده موهبة معينة فى حاجة بس الموهبة دى محتاجة تدريب جيد وهتبقى رائعة لكن بسبب نفاق بعض أصدقاء ليه مثلا يصوروا ليه
أن عندليب زمانه إن كان بيغنى فتلاقى الجيران كل يوم يتخانقوا معاه ومع الست الحاجة والدته وابوه الحاج الغلبان عشان يرحمهم مع صوته فى أغنية جباااااااار لانه شوه صوت الاغنية خالص وكررهم فيها أو واحد يتوهم أنه زويل زمانه وممكن فعلا يكون مخترع كويس بس لو أتعلم الاول وأتعرف على أساتذة سبقوه فى المجال دا لكن بسبب نفاق البعض ممكن تلاقيه من غير دراسة ولا حاجة عمل حاجة عملت تفجير فى شقتهم أو عمل مصيبة عموما وطبعا لازم نفرق كويس بين النفاق وبين التشجيع والتحفيز فممكن يكون واحد لسه موهبته أو إبداعه فى أى مجال على قده فنشجعه ونأخذ بأيده ونعرفه على الطريق اللى يوصله لطموحه دا واجب على اى حد على فكرة لكن اللى بنقوله أ ن تشجعيك لازم يكون فيه نصيحة كصديق وفى لصاحبك ولازم النصيحة تكون بعلم وخبرة فى الموضوع اللى بتنصح فيه لانك ممكن تنصحه نصيحة غلط تسبب أذية ليه – أحنا محتاجين بجد نرجع لربنا قوى نشوف الاديان السماوية والرسل نادت بأيه محتاجين يكون الواعظ الدينى فى قلوبنا مش فى سبحة واحد ماشى بيها وأول ما يشوف واحدة مش بتطيق هدوم كتير عليها يقول ما شاء الله الموضوع مش بس شكل ولا مصاحف وأناجيل كتيرة فى البيوت جواها تحذير من صديق أو صديقة السوء وجواها برده تشجيع وأمر على مصاحبة الصديق اللى يعينك على الخير ويحبلك الخير مش يبيعك فى اول محطة بسبب مال أو بنت أو إشاعات لان للاسف أحنا فى زمن ممكن تلاقى واحد عامل صديقك قوى وتلاقى لو سمع حاجة عنك أو سمع أنك بتكلم عنه بصورة مش كويسة تلاقيه صدق وخد جنب منك من غير ما يرجعلك ويسألك الاول أو لو جالك يكون وشه أحمر وصوته عالى ووجه أبليس هرب اول ما شافه طبعا مش كل الاصدقاء كدا فيه أصدقاء كتير كويسين ومخلصين لكن احنا موضوعنا اليوم عن السلبيات التى جدت فى حياتنا خلتنا بنعتب قوى عشان لاقى صاحب بجد يحفظ الاسرار ويكون أمين معاك فى كل شى مش فى أول ولا تانى زعلة تلاقيه عمل دعاية مجانية لكل أصحابك لاسرارك واللى اتأمنته عليه احنا عاوزين اليوم وبعد مناقشة الموضوع دا نلاقى الايجابية داخل كال واحد فينا – نلاقى التغيير من جوانا بجد صلح انت من نفسك واحنا مع بعض هنكمل وهنساعد بعض أننا نتغير – الحمد لله أنا بدأت فى دا من أكثر من 6/4/2012 تاريخ تأسيس مشروعنا كلنا مشروع فريق طموح للكنوز البشرية التطوعى المستقل اللى من ضمن أهم أهدافه الاخلاق والوسطية وهنا أنا ذكرت الفريق عشان أقول إنى بتكلم كلام واقعى مش خيالى يعرفه كل اللى شارك معانا على ارض الواقع عاوزين مع بعض نطبق دا اكثر وأكثر مش لازم خالص بمسمى معين ومش لازم تحصل على أصدقاء أوفياء بانضمامك لحد أبدا – ولكن شوف اى صحبة خير وكون معاهم بس أتاكد فعلا أنهم صحبة خير وأبعد الله يكرمك عن اى شى فيه مزايدة على الدين أو الوطن يعنى ديننا أسمه الاسلام وبس وبلدنا أسمها مصر بمعنى كفاية تصنيف وفرقة باحزاب وائتلافات وجماعات وفرق – كويس لو عملت مشروع تجمع بيه كل الاعمار والمحافظات التخصصات وكل الفرق والجمعيات دى بس يكون دول بيحبوا مصر بجد بافعالهم لا باقوالهم ومش بزايدوا عليها والحمد لله دا موجود وبكرر دائما فيه مئات المبادرات والجمعيات الوطنية المستقلة التى بتخدم البلد وفى اللى فيها روح طيبة كأنك قاعد مع أسرتك وطبعا ممكن تلاقى واحد أو أتنين فى المجموعة مش كويسين او عندهم غيرة دول لازم نحاول نغيرهم باسلوب فيه رحمة وحكمة ولو مقدرناش نستبعدهم من حياتنا عشان لا يفسدوا صحبتنا
ياترى بعد كل الكلام الكتيييييييير ممكن نتقابل ونتجمع ويكون عندنا إستعداد حقيقى لتأسيس صحبة حقيقية أكثر وأكثر نعيد بيها ذكريات الصديق اللى بمعنى الكلمة ونشجع بعض على نفع مجتمعنا وأمتنا العربية والاسلامية بفعل كل ما ينفعها ونكون كمان من المتحابيين فى الله الذين يظلهم الله بظله يوم لا ظل الا ظله بس حب بجد الاجابة هتجى من تعليقاتكم وأفعالنا جميعا على ارض الواقع كلنا فى أيد بعضنا بامر الله ونرفع شعار معا نصلح أنفسنا بالصحبة الطيبة )
