الشاعرة/نادية البسيونى
تفتكر هانعيش لبكرة
والألم راح يبقى ذكرى
جايز الحلم يهاودنا
والطريق اللى اترسم نلقاه قابلنا
وتلاحقنا ألف نجمة
تجمع الأحلام فى إيدنا
ألف نجمة ازاى فى إيدنا
والليالى بتعاندنا
واما نرسم خط أبيض
ترجع الأيام تشخبط
شىء يلخبط
لما تلقى الكون ملخبط
لما تتحسس ملامحك
وانت مش دريان بنفسك
لما كل الطير يهاجرك
والشوارع والحوارى
تنسى اسمك
وانت قلبك
جوه كورة كبيرة قاسية
ضرب طرح وشد قسمة
حتى اسمك راح وقالك
بكرة اقابلك
