شعر : رضا القرشي
( سألني النجم الإعلامي الكبير
الأستاذ محي عبد الحميد في أحدي فتراته المفتوحه وكان عنوانها ( من أنت ) فا أعتذرت وقتها عن الإجابة لمدي صعوبة السؤال وفي الفترة التالية كانت تلك إجابتي في قصيدتي ٠٠ أصعب سؤال ٠٠
ملاقتش اصعب من ده سؤال
لما اتسألت أنا ابقي مين ؟
وأنا يادوب حبه تراب
وأنا من ماء مهين
وأنا المخلوق في كبد
وأنا روح من روح رب العالمين
وأنا الشايل أمانتها
وأنا بيها من الجاهلين
وأنا الطالع سماواتها
بسلطان علم قبل الدين
وأنا بخل وأنانية
وأنا الخارج عن القوانين
وأنا اللي معايا مش ليا
وأنا فيها من الزاهدين
وأنا بهلول ومدروش
وأنا واحد من المجانين
وأنا عقلي يوزن بلد
و ياما علما ومخترعين
وأنا المغلوب علي امره
وأنا دمعة وقلب حزين
وأنا اللي غروري توهني
و نساني أنا ابقي مين ؟
وأنا قلب كبير بحنانه
ياما داوي مجروحين
وأنا قسوه ما تعرف شوق
وأنا العايش في خوفي سجين 🕸️
وأنا فرحه في ليلة عيد
وأنا لهفة لقا العاشقين
وأنا رقة وحنية
وانا اللي قاتلني الحنين
وأنا توبة في ليلة قدر
ونور حاضر مع الساجدين
أيوه أنا .. أنا كل ده
و إن عشت فيها
سنين وسنين
بالغصب عني
يوم راحل
ورحل ساعات
وأنا لسه جنين
وأنا العشمان
في كرم الله
وربي رحمن رحيم
وأنا الداعي
في قلب الليل
ماليش غيرك
يارب معين ٠
