شعر : رضا القرشي
ياقلبى قولى مين زارك
ومين حبه عليك أثر ؟
ومين تكتب له أشعارك
ومين بالقسوه فيك كسر ؟
ومين عنه متستغناش
ولا تقدر على فراقه؟
ومين بتقوله لابلاش
ومهما يغيب ماتشتاقه ؟
ومين تقسم معاه الحلم
و جوه الحلم تتلاقوا ؟
ومين يقسم معاك المر
ويصبح شهد لو داقه
قول لى مين زى النسيم
جالك بقلبه وفرحته
جبلك معاه سر الحياه
وسقاك بشهد محبته
ودك عليه عمره ماهان
ولا عمره مره جرحك
عالبعد لك حضن الحنان
وقصده بس يفرحك
يتمنى لو ينول رضاك
أو حتى مره يلمحك ؟
