كتب . أشرف الحواط
حياتنا عبارة قطر وسفر وسكه مليانه محطات وبين كل محطة ومحطة بنتعلم حاجات كتير وبنقابل تحديات وعقبات لكن لازم نتغلب عليها عشان نوصل للمكان والمكانه اللي إحنا اتمنناها لنفسنا .
وف وسط المحطات دي كانت محطة عجيبه وغريبه والمسافة بتاعتها كانت سريعة جداً تحديداً ف عز امتحاناتها الدراسية حاجات كتير اتبدلت واتغيرت من الفرح والسعادة للحزن والانكسار لما بطلة قصتنا البنوته الجميله سمعت وشافت فجأة والدتها لونها بيتغير والتنفس بقى صعب والمصحف في ايديها وعنيها بتتحرك حركة سريعة يمين وشمال وبتنطق الشهادة … كله ده فجأة والبنوته الجميلة مش فاهمة اللي بيحصل ولا عارفه تتصرف إزاي ؟
حاجه صعبة جداً لما اللي بتحبه يروح منك ويفارق الحياة بين ايديك فجأة وبدون مقدمات وخصوصاً لما تكون الأم .
واتحول البيت السعيد لكهف عشش فيه الحزن حتى الحيطان ظهرت عليها تجاعيد الوجع والكل صابه الدهشة وانكسر حتي الصور .
والصبح كان الامتحان وسط الدموع والتعب والبنت رافضة أي شيء لأن الحلم انكسر مبقتش فرقه لمين وعشان مين أذاكر وانجح وانتصر وأبوها واخواتها وكل اللي بيحبها بس لازم يابنتي تراجعي وتروحي الامتحان والدنيا مش هتقف وتفرحي وتفرحي ماما وتحققي حلمك وحلمها .
والبنوتة الجميلة رفضه لكل شيء حتى الأكل والشرب والحزن مالي قلبها واتبدلت الضحكة ببحر دموع اللي غطا ملامح قلبها ووشها البرئ .
وف وسط كل الأحداث المره دي يكون الأمل اللي ربنا يحييه في قلبها من جديد إنها لازم تكمل مشوارها في عالم النجاح والتفوق وخصوصاً إن ربنا فاتح عليها من صغرها وطول عمرها متميزه في مراحل التعليم المختلفة .
الأمل ده هوا والدتها وأقرب الناس لقلبها حتي شبهها اللي ساكن ملامحها ومن هنا كانت الانطلاقة القويه والإبتسامة اللي غرقانه في بحر الدموع واتبدل الحال من الانكسار للانتصار واكتمل المشوار بعزيمه وإصرار وإرادة قوية ونهاية لمحطة الحزن بنسبة تميز 95.54% في الشهادة الثانوية الأزهرية 2020 عشان تبقى أول خطوة في عالم التحدي والإصرار تفرح بيها نفسها وكل اللي حواليها وخصوصاً والدتها اللي كان نفسها تكون معاها ف يوم زي ده وتشاركها فرحتها زي ما كانت متعوده بس الحمد لله على كل حال .
البنوته الأزهرية الجميله دي تبقى / إيمان حمدي عرفات عبده نموذج رائع مشرف للعزيمة والاصرار من سكان الحواط مركز منيا القمح محافظة الشرقية .
1000مبروك يا إيمان ربنا يكرمك ويوفقك ويسعدك ويرحم والدتك اللي أكيد فرحانه بنجاحك دلوقت .
