الشاعرة/نادية البسيونى
ما تسيبش بكرة
—————-
عهد الهوى لو كنت فاكره وتعرفه
مكتوب علينا نحفظه
والبعد مهما فرَّقه
لحن المحبة يقربه
عصفور يا طاير فى الفضا
سمعنى صوتك بالشدا
قل للسحاب اللى ابتدا
يعطف علينا بالندا
قول يا حبيبى احنا اللى عشنا سنين سوى
واحنا اللى عمر العهد بينا ما انطوى
وان سيبنا بكرة ازاى نكون أهل الهوى
وازاى ندوق حلم المحبة اللى استوى
واحنا اللى ياما لكل داء كنا الدوا
قول يا حبيبى ازاى شجرنا يهون بفُله
وازاى تفوت الشمس مرة وتنسى ضله
وازاى نبدل طعم حلوُه بطعم مُره
طب لو سألنا الفجر عنه إيه نقول له
هو القمر لو طال سهر كان ينسى خله
ولا الطيور عن حلمها تستغنى عنه
ده البحر حتى للسحابة يبوح بسره
والنظرة دايما للجمال يحلالها فنه
غنى لى غنوة تملا إيدى بالسلام
وتفيض سنابل خير تبارك فى المكان
غنى لى واضحك ضحكة عالية للزمان
واحصد معايا الحب نوصل للأمان
