بقلم / كيرلس فتحي
روحت البحر إنهرده وبما إنى بروفشنل فى العوم ، صحابى سألونى ..
– بتعرف تعوم ؟
– عيب يابنى إنت وهو تسأل السؤال ده ، دا انا من زمان فى البحر ، دانا اضرب بدراعى كدا اجيب إيطاليا وبالدراع التانى أطلع عاليونان .
المهم قالو المايه هاتكدب الغطاس ..
نزلت البحر وإعتمد على إنى طويل ولامس الأرض ، فضلت أدخل وأنا مطمن لغاية ما وصلت لحته عميقه وهوب ضبل كيك غرقت ، غرقت بمعنى الكلمه ، للأسف صحابى مافيش حد فيهم بيعرف يعوم ، فضلت أعافر لغاية ما تعبت وخلاص شبه إستسلمت للموت النفس بدأ يقل وروحى بدأت تتسحب منى من صدرى ، بضرب برجلى فى المايه حلاوة روح ، فى ثوانى قليله جدا إفتكرت كل الكلام اللى كنت بكتبه على الفيس عن القوه والأمل وماينفعش أتعب ولازم أكافح لغاية أخر نفس ، قولت إزاى أقول الكلام ده وماعملش به فكرت للحظه إنى هاعيش وهارجع تانى وهابقى بخير ، ساعتها الخوف قل شويه ، وكأن طاقه متخزنه جوايا خرجت ، وفضلت أرفع نفسى عشان أعرف أتنفس بكل قوتى ، مره وأتنين لغاااااية ما جه منقز الشط وشدنى الحمدلله ، الفكره هنا لو إستسلمت لصوت الموج العالى وسحبه ليا ، وملح المايه اللى عمى عينيا كان زمانى فى تعداد الأموات ….
بس إستنتجت حاجه مهمه جدا من اللى حصلى ..
لو زادت كل الضغوط عليك إيه اللى هايحصلك لو سبت نفسك ..
هاتتعب نفسياً لدرجة إنك هاتكره كل اللى حواليك وهاتعيش منعزل وده هايأثر عليك بالسلب فى كل إمكانياتك ، زى تفكيرك ، عواطفك ، قواك البدنيه مش هاتعرف تشتغل ، أعضائك الداخليه هاتعجز وتعطل ، مؤشر حياتك عموما هايهبط لأقل درجه ….. وبدل ما تتقدم خطوه هاترجع ألف ورا ، بص انا عارف ان مافيش حد فينا يقدر يسيطر على نفسه فى الظروف الصعبه دى ، بس تعالى كدا وركز فى حاجه واحده بس وهى إن المشكله هاتتحل وكل حاجه هاترجع زى الأول وأحسن ، إرتحت شويه صح وأخدت نفس عميق ؟ طيب لو ركزت فى الحاجه دى على طول ، عارف إيه هايحصل ؟
هاترتاح نفسيا ، مستوى تفكيرك هايرتفع ، نفسك هاتتفتح لكل حاجه فى حياتك ، علاقاتك الاجتماعيه هاتزيد ، هايكون عندك أمل وهدف وثقه فى انك هاتقدر تحل مشكلتك وإنك قدها وقدود ، بس أهم حاجه لازم تعملها ، ماتكبرش المشكله وتديها أكبر من حجمها حتى لو كل الناس مكبراها ، انت صّغرها وبصلها من فوق وحط جوا مخك انك هاتقدر تحلها مافيهاش فصال ..
ماتسمعش لأى حد يقولك مش هاتقدر واحسنلك تبعد عن أى حد يقولك مش هاتقدر ، قرب من الناس اللى بتضحك دايما حتى لو طفل ، حتى لو شخص متسول دايما بيضحك المهم انك تقعد مع حد يبسّط الدنيا فى وشك مايعقدهاش ويكلكعها ، أبعد عن السوشيل ميديا لو شايفها انها بتديلك شحنات سلبيه ، فى صفحات كتير ترفيهيه ،وتنميه بشريه ، ومعلومات قيمه إشترك فيها ، إمنع فوراً الكلام مع نفسك اللى من نوع إنك مظلوم ومهدور حقك ، وغيرك عايش أحسن منك ، كلامك مع نفسك بالطريقه دى بيزود الحمم البركانيه اللى جواك ولو إنفجر إنت أول واحد اللى هاتتأذى وفى الأول والأخر والأهم من أى حاجه كّون علاقه بربنا قويه جدا وماتنساش أنه أكبر من أى شئ وقادر على شئ.
