كتبت:حنان فتح الباب
قال “عمرو بدر ” رئيس تحرير موقع “بوابة يناير” ان النغمة اللي ماشية دلوقتي واللي بيرددها كتير من الناس بقصد او من غير قصد ان نقيب الصحفيين استاذ يحيي قلاش واتنين من الزملاء أعضاء مجلس النقابة كانوا متسترين علينا ،، وأننا كنّا هربانين من قرار ضبط وإحضار ، وتابع رئيس تحرير بوابة يناير، في منشور له عبر صفحته الشخصية، على موقع التواصل الاجتماعي”فيس بوك:” واللي هقوله حالا هو اللي حصل يا ريت الزملا الصحفيين ياخدوا بالهم اثناء النشر ،، رجاء
اولا: احنا رحنا انا والزميل السقا لنقابة الصحفيين من غير ما اي طرف يخطرنا بقرار ضبط وإحضار صادر ضدنا،، سواء من خلال نقابة الصحفيين او اثناء ما الامن دخل منازلنا ،، واعتصامنا بالنقابة كان ضد دخول الامن منازلنا مرتين ،، واضاف” بدر” ،ومهم ان الناس تعرف ان الزميل محمود كامل راح قسم شرطة شبين القناطر علشان يفهم الامن راح بيوتنا ليه وكان الرد منعرفش ومش احنا اللي رحنا ،، يعني قسم الشرطة نفسه مكنش يعرف ان فيه قرار ضبط وإحضار ولا اخطر الزميل محمود كامل بالكلام ده ،،
ثانيا: لما رحنا النقابة مكناش هربانين من ضبط وإحضار لكن كان احتجاج علي دخول الامن لبيوتنا ولما سمعنا ، مجرد سمع ، انه احتمال ، مجرد احتمال ، يكون فيه قرار ضبط وإحضار، وأوضح قائلا: طلبنا من الاستاذ النقيب انه يتواصل مع جهات قضائية وتنفيذية علشان يعرف هل فيه قرار ضبط وإحضار ولا لا ولو فيه ايه الأسباب ،، واتفقنا مع النقيب انه لو كان فيه قرار ضبط وإحضار فعلا هنروح للنيابة مع المستشار القانوني للنقابة علشان نحضر التحقيقات ،، واتفقنا ان ده هيحصل يوم التلات يعني بعد انتهاء ايام الإجازة اللي هما عيد العمال وشم النسيم وكانوا يومين ورا بعض ،، وكان لازم ننام في النقابة لان فيه أمن بيروح بيوتنا من غير ما نعرف السبب ،،
ثالثا: احنا قابلنا الاستاذ يحيي قلاش في النقابة في لقاء معلن ،، يعني مفيش تستر ولا سرية من اي نوع ،، والمواقع الالكترونية أعلنت اننا موجودين في النقابة ونشرت صور بده ودعينا زملائنا انهم يحضروا معانا ،، وطبعا مش معقول حد يتستر علي حد ويبقي بيعلن وينشر ويتصور وقاعد مع عشرات الزملا اللي كانوا موجودين في النقابة ،،
رابعا: الزميلين خالد البلشي وجمال عبد الرحيم كانوا مسافرين المغرب في نفس اليوم اللي رحنا فيه النقابة ،، وقابلناهم لمدة دقايق بس ومفيش اي اتفاق تم بينا من اي نوع ،، ويوم اقتحام النقابة كانوا في المغرب فعلا ،،
خامسا: الكلام ده هو اللي احنا قلناه في تحقيقات النيابة بالظبط ومقلناش اي كلام تاني ،، ونفينا تماما تهمة التستر عن النقيب والزملا أعضاء المجلس ،، واختتم”عمرو بدر”منشوره قائلا
“دا اللي حصل بالظبط وأرجو ان ده يكون توضيح يساعد في فهم قضية سياسية ملهاش علاقة خالص بالتستر او غيره ،،
