كتب:حسام داود
لا اللى إتظلم موسى
ولا اللى ظلم فرعون
إحنا فى زمان مختلف
فيه كل شئ مجنون
ولا حدش معاه العصا
دا الكل شال آيفون
بس السحره هما هما
والنفاق على كل لون
عاش الملك مات الملك
مايهمهمش غير البطون
دى ناس بتتنفس نفاق
وعايشه بس عشان تخون
وأكل عيشهم من الرياء
فى الغدر ليهم الف جون
وإن عدل ساد فى البلد
هيكون مكانهم فى السجون
بس الغريبه الملوك عرفاهم
لكن وللاسف محتاجاهم
يزيفو للخلق الحقيقه
ويقلبو اليقين ظنون
بيتاجرو تملى ف وجعنا
ومسلمين ليهم دماغنا
وإحنا طول مامصدقينهم
إحنا نستاهل فراعنه
ولا يكفيناش فرعون
إحنا نستاهل فراعنه
ولا يكفيناش فرعون
