وقبل النوم هقول كلمه
برغم الزحمه واللمه
تلاقي وحيد ف وسط الناس
تلاقي بنات حياتها عناس
برغم الزوج والأولاد
حياتنا كلها بتتعاد
حياتنا شبه تذنيبه
مابين الشباب والشيبه
سنين بتفوت
تضيع مسافات
وناس بتموت
حنين وأهات
وكله ماشي بالمعكوس
وحب اساسه بس فلوس
وناس عايشه ماليها نفوس
وناس ماتت من الهتافات
لوحدك بس ف السكة
ومحتاجلك كمان زقه
وما بتجيش
لازم لك الف مية كلمه
علشان لتعيش
وراضي بذل وبقسمه
عشان العيش
وراضي تدووس عليك جزمه
تموت مقهور
ونفسك يوم تخطي السور
ما بتعديش
وهتلاقي فقير مطحون
مابين الناس حياته شجون
وفقره كان له يوم خنفه
وأكله يابني كام شقه
يكون له العون
وبنت تحب كام واحد
والرابع كمان وارد
حياتها بس ف التليفون
وناسيه حلال من المأذون
يكون لي العون
وواد عايش حياته طناش
ما بين قسوه وخوف رعاش
وشاف الدنيا وماشفهاش
وعاش كرتون
يكون له العون
وأم عيالها كانو زنقه
وأب مراته كانت خنقه
مابين الحب والزهقه
حنان مدفون
يكون لها عون
وابن يتيم برغم أبوه
مالوش صاحب برغم أخوه
مالوش صاحبه برغم الأخت
مالوش مجلس برغم التخت
وكله اتخلى عنه رموه
عايش مظنون
يكون له العون
ودين اتجسد ف تشكيله
ما بين حرمه وتحليله
ودينا وسطي مش نيله
ولا معقد ولا مربوط
بفتيله
ورب الكون
يكون لنا عون
وحاكم مره إتنرفز
وخلى جنوده تتحفز
وتقتل كل من عارض
وتحبس كل من عارض
وتجعل منه شئ شارد
يكون له العون
حياتنا كلها مراكب
وحزن ف مركبك راكب
وعيشه عايشه بالواجب
ملخصها
ومقصدها
أعيش فيها وانا موارب
