العادات البور

شعر/نادية البسيونى

طفلة حلوة بمريلتها
أحلى وردة فى جنينتها
شايلة شنطة بنجمة فضة
نجمة بتزين واجبها
شافها جارها
راح خطبها
قالوا زين مااختار نصيبها

زوقوها وكبروها
سيِّبوها مدرستها
والقرار كان صعب جدا
لما شالت فوق طاقتها

واما قالت بين عيلتها
العادات البور تعيبها
قالوا بنت الريف لبيتها
مهما قاست طول حياتها

طفلة حلوة بمريلتها
كل شىء كان مش بإيدها
لون جهازها
يوم زفافها
حتى دبلتها وساعتها
واما ألعابها سابتها
الطفولة ودعتها