رونزا ومالك وعود الياسمين

بقلم : دكتورة زينب زكى

كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام .. كان بنوته جميلة اسمها رونزا وولد شاطر اسمه مالك .. بيحبوا مامتهم جدا .. وبيعتبروها صاحبتهم .. مش بس مامتهم ..

وفى يوم من الايام .. الاولاد فكروا يخرجوا مع بابا محمد ويروحوا معرض الزهور .. علشان يتفرجوا على اجمل زهوره .. ومن هناك يشتروا هدية جميلة .. لمامتهم الجميلة .. وفعلا راحوا المعرض مع بعض وبدأوا يفكروا يا ترى ايه احلى واجمل زهرة نهديها لحبيبتنا ومامتنا.

رونزا اقترحت الوردة البلدى الحمرا .. ومالك اقترح القرنفل .. أما بابا محمد فقرر يهديها عود ياسمين
وقال العود دا شبه مامتكم حبيبتى .. هزرعه ليها فى جنينتى .. يكبر ويملى الدنيا زهور جميلة
ومالك قال وانا كمان هجيبلها عود قرنفل .. ورونزا الجميلة قالت وانا هجيب من الورد البلدى تشكيلة علشان نزين لها البيت والجنينة .. واشتروا الاولاد الورود الجميلة وراحوا على مامتهم حبيبتهم يفرحوها ويعملولها مفاجأة جميلة ..

ماما لما شافت الورود الجميلة فرحت بحبايبها الحلوين انهم قدروا يسعدوها باختياراتهم الجميلة لكن نصحتهم نصيحة جميلة ان الزهور علشان تعيش محتاجة عناية واهتمام علشان نحافظ عليها .. وقرروا يتعاونوا مع بعض ويعتنوا بالزهور الجميلة وزينوا بيها جنينتهم وكمان بلكونتهم.
وتوتة توتة خلصت الحدوتة
ماما زوزو