د.محمد أمين جاد
أسباب ثبات الوزن كتيرة، منها الخارج عن إرادتنا، ومنها للأسف اللي بنكون متسببين فيه ومش واخدين بالنا، ويارب الموضوع ده يفيدكم.
بعض الأسباب اللي ممكن تلاقي واحد منهم مطابق لحالتك وتقدري تتعاملي معاه.
أولاً .. وزنك ثابت أو بينزل بمعدل قليل .. تتقال بعد ما تعملي رجيم لمدة 30 يوم وتلاقي نفسك ثابتة أو مثلاً بالكتير كيلو أو إثنين.
إنما عاملة رجيم يومين ولا أسبوع وفي الآخر ثابتة .. مش منطقي يكون في شكوى لإن أصلاً منقدرش نحدد من المدة دي المشكلة ولا نقيمها.
٢- وزنك ثابت بسبب خمول في الغدة الدرقية .. في الحالة مطلوب تحليل ودكتور غدد يكتب لك دواء يخلي الغدة تعمل بكفاءة وتقدري مع الرجيم تلاقي تغيرات ملحوظة ونزول في الوزن.
٣- مقبول إنك في بداية الرجيم متعمليش رياضة ” مشي أو جري ” لكن بعد نزول وزنك لو فضلتي مهملة ومش بتتحركي هيكون ده سبب في بطئ معدل النزول، لذلك أول ما وزنك يبدأ ينزل وتحسي إنك خفيفة وقادرة تتحركي إبدأي إمشي بقى ولو ربع ساعة في اليوم ومرة في مرة تزودي المعدل
٤-وزنك ثابت بسبب إن الدهون بتقل كوزن والعضلات بتزيد كوزن وفي الحالة دي المحصلة ثبات في الميزان مع تغير في مقاسات الهدوم وده شئ مش وحش أبداً ومطلوب منك في الحالة دي تصبري لحد ما وزنك كمان يبدأ يتحرك بجانب المقاسات.
٥- وزنك ثابت علشان قربتي من المثالي .. وطبيعي في الحالة دي وزنك يبدأ ينزل ببطئ شديد وتلاحظي ثبات لفترات طويلة.
٦- وزنك ثابت علشان بتغيري المكان والتوقيت اللي بتتوزني فيه .. ثبتي المكان والتوقيت ..
٧- الملح الكتير في الأكل سبب في ثباتك على الميزان.
٨- يا دكتورة والله العظيم ملتزمة ومش عارفه مش بنزل في الوزن ليه !! والسبب يطلع في الآخر إنك بتاكلي فاكهة كتير .. وهي الفاكهة يا دكتوره بتتخن ؟؟
مش بتقولى ناكل فاكهة .. آه طبعاً الفاكهة عظيمة وقت الرجيم وغيره لكن لو هدفك تخسي مينفعش يومك يعدي بأكثر من ثمرتين في حجم البرتقالتين كده أكثر من كده هتكوني دخلتي جسمك سعرات عالية جداً ممكن تكون عائق كبير قصاد نزولك في الوزن.
٩- قلة الأكل بشكل مبالغ فيه سبب في ضعف معدل الحرق والنزول بمعدل قليل على عكس المعتقد السائد أنه كل ما تقللي في الأكل كل ما هتخسي أسرع
١٠ – التوتر والإكتئاب والحالة النفسية السية وقلة النوم سبب رئيسي من أسباب ثبات الوزن وده اتكلمنا عنه كتير قبل كده.
١١- نقص فيتامين ” دال ” يسبب ثبات الوزن
١٢- الإمساك .. سبب في ثبات الوزن والعلاج تهتمي بالمياه الكتير بجانب أكل الخضار ومعلقة زيت الزيتون هتفرق معاكي
