كلمات : ضيا طحاوي
القوة مش فرد الضلوع
وكلام يطير وقت المحن
القوة فعل… قرار
ما يقبلش الرجوع
أصل الجدع وقت الوجع
وقف وسد بقوته
وجه لوحده بالخلا
وصرخ بأعلي صوت
كان كاتمه كان هايموته
داري الدموع
وحبس نزولها برغبته
وسند بضهره ع الكريم
ورفع رأسه للسما
من غير ما يسأل يوم لئيم
اللي عرف أخرتها يوم
نجا بروحه من مكرها
واللي بيجري وراها دنيا
غاب وعيه في بحرها
مغرور بلمعان ينطفي
موهوم يغير طبعها
ولما يفوق علي شرها
يضرب كفوف علي سكته
يوم ما فضل بوكرها
نقطه سلام
…..
خطوة رجوع
مدفوعة غرامة المشوار
لطريق مشيته كان غلط
وأخدت بيانك وإتختم
مكتوب عليه فاتورة حساب
وبين قوسين
( فاتورة غلط )
