مهما كنا ومهما كانت
عمرها في يوم ما ضعفت
ولا استكانت
باقية دايما زي ما هيه
رافعة راسها وقوية
ومهما حصل في الدنيا ديه
ومهما دارت مصر باقية
زي خوفو
زي خفرع
فوق جبين الدهر عالية
جوه قلوبنا هي غالية
باقية فينا زي روحنا
ومهما كنا ومهما بوحنا
اللي في القلب باقي
أكبر حتي من جروحنا
نبكي نحزن لكن نفوق
ومهما اتكدرنا بكرة نروق
ونقضي علي الإرهاب بكلمة
وبالعدل وبالحقوق
نعرف إزاي نبني مجد
نعرف إزاي نشرق لغد
ونربي أولادنا بجد
علي إن دينا دين السلام
وكل مصري أخ لمصري
دي حقيقة مش كلام
واللي نصب لينا فخ
فيه بيوقع
عارفين ليه لأن مصر باقية
زي خوفو زي خفرع
زي رمسيس وأحمس
وفي قلوبنا الحب يهمس
واللي يخطط لهدمها
تخطيطه عمره ما ينفع
لأننا كلنا واحد
رب واحد أرض واحدة
في الكنايس الناس تصلي
وفي الجوامع الناس ساجدة
والإرهاب عدو لينا
هنهزمه بإيد واحدة
بأي دين قتلتونا
وسلبتونا أعز حياة
في مسجد كنا أو شارع
في كنيسة أو جامع
أو مصلاة
قتلتوا منا كام واحد
قتلتوا محمد وحنا
وجندي بيأدي الخدمة
يحلم يرجع لبلده ويتحني
وهب روحه وحياته
لأجل يحافظ علي عرضي
مات رافع علم بلدي
يا راية سودة ممدودة
مرفوعة بروح الغدر والكفرة
وناس أفكارها محدودة
ناسية إن الحساب بكرة
في نار قاسية مترحمشي
تدوم فيها متخرجشي
ومهما خدتوا من الدنيا
وطولتوا
هتقابلوا وجه عظيم
ومهما كان الظلام دامس
هيجي نهار
ومهما كانت القسوة
هتنبت في صحاري العنف
زهرة الصبار
ومهما كنا نتأخر
مسيرنا يوم هنعدي
ومسير الحلم هيكبر
وتشرق شمسنا الوردي
علي بلادي وعلي نيلي
وعلي أرضي
وعلي كل مصري حقيقي
وعلي كل طفل وجندي
واقف علي الحدود زنهار
هيجي يوم نعيش في سلام
ومهما زادت الضلمة
أكيد لازم هيجي نهار
بقلم / كواعب أحمد البراهمي
