نشر : أيمن جميل

نشرت صديقتى الإستاذة / سارة القاضى على صفحاتها بالفيس بوك بعض التجارب التى يسفيد منها الانسان لمواجه الحياة ومنها شوية حاجات كدا اتعلمتهم من الدنيا فالكام سنه اللى عيشتهم دول

1-متتريقش على حد عشان مهمها لفت الايام هيجى يوم ربنا يبتليك باللى اتريقت بيه
حقك متسيبهوش لو ربع جنيه خده بس متسيبهوش

2-شيل فلوس على جنب متصرفش فلوسك كلها على حاجه واحده محدش ضامن الظروف

3-متمشيش ماسك موبايلك فى الشارع عشان بنسبه كبيره هيتشد منك

4-قرب من الناس اللى بتحبهم قرب منهم اوى قولهم كلام حلو وراعى خاطرهم عشان الموت مبيستاذنش فى لحظه هتلاقيهم اختفو من حياتك واحساس الندم مفيش اصعب منه

5-ارفع الداتا بتاعتك من الموبيل للGmail عشان بقدر الله اتحرق او جاب سوفت او حتى اتسرق تعرف ترجع الداتا من تانى عشان بيبقا فيه زكريات فيديوهات وصور لو ضاعت بتندم العمر كله عليها

6-متشلش معاك فلوس كاش فى الشارع خلى معاك كريدت كارد او حتى فودافون كاش او اى محفظه الكترونيه تانية

7-متصرفش فلوسك كلها على الخروج والاكل كل متقع معاك فلوس بزياده شيل منها على جنب والباقى هات بيه لبس جديد .. انك تستفاد بيه بحاجه ملموسه احسن مايطير فالاكل والخروج

8-اتعلم لغه الناس اللى بيعرفو لغات اجنبى الكل بيحترمهم

9-تابع سياسه مش بس محليه ومش من قنوات بعينها تابع سياسه من محطات اخباريه دوليه محترمه مش لازم تدخل فى تفاصيل يكفى تعرف الهيد لاين عشان لو قعدت فى مكان وبداو يتكلمو في السياسه متكونش دوغوف

10-خلى حياتك صحيه مفيش احلى واخف من الاكل الصحى مش بس هيساعد ان جسمك يتخلص من كل الفات اللى فيه لا انت هتحس ان حياتك اتغيرت 180د وبقيت مقبل على الحياه

11-حاول تفصل الماديات فى علاقتك بالناس حتى لو كان اخوك انتو اه اخوات بس الماديات خلي التعامل فيها فورمال اوى عشان متخسروش بعض

12-ادخل سينما وتابع الافلام المصريه والعالميه اعرف عن النجوم العالميين تابع مسلسلات اجنبى اسمع اغانى انجلش خليك دايما updated بالجديد العالم بتاعنا مفهوش حاجه عدله غير الفن خليك متفتح على كل ثقافات العالم متبقاش ضيق الافق

13-خليك بارد فى اعصابك الدنيا هتضربك على دماغك كل فتره قوم واقف واضحك وقولها (هل من مزيد) اصل لما انت تتعب نفسيا وتكتئب مش هتصعب على الحياه وتبطل تديك خوازيق

14-الشخص اللى مبترتحش فى قعدته متقابلوش تانى ، المكان اللى مبتحسش فيه براحه مترحوش تانى ..متضغطش على نفسيتك مش مستاهله

15-اتعلم متحطش املك كله على حلم خلى عندك حلم سبير عشان لو حلمك الاول فشل متتدمرش

17-اعرف ان الدنيا مبتقعدش على حال واحد الشخص اللى كنت بتكرهه انهارده مش بعيد يبقا اعز صحابك بكره ، بيت العيله المفتوح 24 ساعه وكلكم متجمعين ممكن بكره يتقفل ويبقا عباره عن زكريات خليك شخص Fleixable واعرف وانت بتتعامل مع الناس ان مفيش حاجه دايمه

18-حاول على قد متقدر يبقا عندك سلام داخلى مش بطلب منك تكون ملاك بس على قد متقدر تبقا مسالم وتحب الخير للناس وتفرح لافراحهم وتمنى ليهم التوفيق حتى لو كانو ولاد كارك مفسش احلى من ان النفسيه تبقا مرتاحه

19-خلى فيه خط فى علاقتك مع الناس حتى صاحبك اعز الناس ليك او شريك حياتك اللى ملكش فالدنيا غيره حاول تركب لوح ازاز شفاف بينك وبينه عشان انت مش ضامن الايام اللى جايه شايلالك ايه متسلمش روحك وحياتك وفرحتك لحد .. كله بيمشى متصدقش

20-ابعد برج العقرب والجوزاء عن حياتك الاول (ملوش عزيز) والتانى (ملوش ماسكه) لازم يكون فحياتك عالاقل واحد اسد وواحد حوت .

21-فك كرب الناس ، ساعدهم وشيل عنهم بكل ما تملك اسال على دا وكلم دا واقف مع دا صدقنى اول ما تقول اى هتلاقي الف مين يشيل عنك وجعك

22-اما تخرج مع صحابك ابعد عن جو المولات والمطاعم والكافيهات ادخلو سينما ملاهى .. اطلعو سفارى .. سكاى دايفينج .. باراشوتنج .. اعملو حاجه مجنونه عيشو شبابكم سيبو الكافيهت والمولات لما تعجزو

23-عايز تعمل حاجة اعملها دلوقتى متاخرهاش عايز تصالح حد صالحه دلوقتى متاجلش عايز تشترى لحد حاجه هتهاله دلوقتى عايز تفرح حد بحاجه فرحه دلوقتى الدنيا دى وحشه اوى مش مستاهله ان حبايبنا يروحو لربنا وهم زعلانين مننا

24-اعمل الخير وارميه البحر صدقنى بكره هتلاقيه على شطك لما تحتاجه

25-اتعود متحطش بيرفيوم خاص بيك ومتتعلقش بأى مكان زيادة عاللزوم

26-اتفرج على انيميشن يابانى هو مش كارتون والله الانيميشن من احلى 3 حاجات على كوكبنا المتواضع

27-خلى دايما كلامك معسول ولسانك ينقط سكر الموضوع دا بيخلى اللى قدامك يحطك على راسه

28-خلى ليك الكاركتر الخاص بيك اوعى تكذب وتتجمل اوعى تعيش فى دور مش بتاعك خليك على طبيعتك احسن مليون مره

29-متضربش ابنك اياك تمر ايدك عليه او توجعه هتمر الايام وهينسى هو اتضرب ليه بس هيبقا فاكر العلقه بكل تفاصيلها

30-متبقاش وقح لا مع الغريب ولا القريب فيه ناس بتاثر فيها اقل كلمه حتى لو مبينش ليك كلامك بيوجعه وبيسيب فيه اثر مش بيتمسح مع الوقت

31-قبل متعلم ابنك اى حاجة فى الحياه علمه يكون انسان بس كدا

32-هتدخل الجامعه وهتقابل ناس غريبه عنك باتجهات غريبه وافكار اغرب حاول تتاقلم وتتقبل الكل ومتتاثرش بافكار حد

33-دورلك على صديق يكون شبههك يكون بيحب اللى بتحبه وبيكره اللى بتكرهه لان دا الوحيد اللى هيفهمك ودا اللى هيحس بيك وبوجعك من نبره صوتك ونظره عينيك