(مربعاتي .. حياتي )مجمل مشاركاتي في سيجال رابطة شعراء العامية المصرية سيجال الأمراء
بقلمي ……..
معوض حلمي
منشأة بطاش
تمي الأمديد
دقهلية
البت سايقه ف دلالها
سقياني مري دوايا
وياعمي طالب وصالها
حويت ياجي ميت حوايا
عشان لما تاجي أشيلها
ف نن عيني وحشايا
_______________
ع الخد .. غمازتين
ف الحسن آيه وموهبه
ترميني بنظرة عين
نظرة عينيها مرعبه
وانا بس مخضوض حبتين
درجة حرارتي ملهلبه
_______________
هاوصف ف حبك واعيد
وازيد حكاوي وغناوي
ملكتي روحي أكيد
زادت جروحي تعالي
_______________
هاوصف ف حبك حناني
رماني صدك قتيل
إمتى يوافق زماني
على قدي قدك يميل
________________
هاوصف ف حبك هيامي
وقلبي ف غرامك شريد
لو تبقي حبل إعدامي
هاموت ف حبك شهيد
________________
هاوصف ف حبك واهاتي
أنا أصلي دايب صبابه
واقف ببابك يوماتي
توصف حكايتي الربابه
_______________
هاوصف ف حبك وادوب
يادوب حروفي تكفي
ياما دابت عشانك قلوب
هاتوب لو تاخدي بكفي
_______________
باوصف ف حبك بدمي
شرياني واصل وريدك
يابت رقي وحني
من صغري قلبي يريدك
_________________
هاوصف لأهلي وناسي
مشاعري اللي زايده عشانك
هادوب واعافر وآآآسي
وانول مرادي بوصالك
_________________
أوصف ف حبك هوايا
وحالي مايخفى عليكي
تعالى حضنك دفايا
وافرد جناحي عليكي
________________
باوصف جمال اللي جابك
جمالك ملوهش مثيل
رماني عقلي وجالك
وصالك يداوي العليل
_________________
باوصف جمالك بعيني
وعيني قبلك ماشافت
ولما غيبتي وجيتي
غضت بصرها وخافت
________________
زايد ف قلبي الوجد
فيه الحكاوي كفايه
ملهوف عليكي بجد
خليت عيوني ف قفايه
________________
محبوب وفايق بطبعي
مشكلتك انك عبوسه
مطلوب ياحلوه تحني
وتفارقي زمن العنوسه
وتبقى حلالي ياستي
ف الكوشه جنبي عروسه
_________________
باغزل ف حبك قماشي
محتاج ياحلوه لمقاسك
هواكي جاي ولا ماشي
دليني على أهلك وناسك
ردك مسافر ماجاشي
وانا قلبي ف هواكي ناسك
________________
باعمل ف حبك محاوله
وانا صبري فاق الحد
وجوله ورا جوله
لقيتني حيلي اتهد
________________
وقعني حبك ف ورطه
طويل لساني مايسكت
طلبتي سلمون وقشطه
واخبزلك بإيدي المشلتت
_______________
بانخل ف حبك مشاعري
واحرق عشانك ظنوني
والت واعجن ف عمري
وبرضه طاير جنوني
________________
باوزن ف حبك دماغي
يابت وعيونك كحيله
سهمك رماني جاب داغي
بلاغي لله مابيدي حيله
_______________
باوزن ف حبك اوضاعي
وانا اللي فاكرك أميره
خلطت شايي بنعناعي
وشربت خيبتي التقيله
______________
باوصف ف حبك للقمر
وانتي تقوليلي البرد
ياعم صيفك جبر
ياعم نام واتهد
~~~~~~~~~~~~~
