كبسولة مركزة للناس المهيسة رقم ” ٥ ” أغلقوا النقابة إللي محولينها فندق هههههه!!!

إقتحام عناصر من الأمن نقابة الصحفيين ، من ناحية أخري قامت العناصر سالفة الذكر بإصطحاب الأمن الخاص إلي مكان وجود الصحفيين وإخطارهما بقرار النيابة بالقبض عليهما وسلما نفسيهما طواعية ودون ثمة مقاومة تذكر ده طبعاً علي لسان المسؤول الأمني بوزارة الداخلية .

علي رأي عم ” أبو النجا ” يا حلاوة ، طيب يا عم المسؤول الأمني أقعد مع نفسك وكرر الكلام إللي قلته ١٣ مرة ، شوف إنتي هتقوله في كل مرة زي ما صرحت ولا الكلام هيتغير ، دا إنت يا عم الحاج لو داخل تجيبهم من طيارة مختطفة مش هتقول الكلام دة ، طيب هقولك علي حاجة إنت لما بتطلع تقول التصريحات دي بتبقي قاعد مع نفسك وتقسم وتمزك وتعمل خطط ، تبعاً لسياسة ” خيالي واسع إذن أنا ماسك ” طيب أحيانا الواحد لما بيشطح تفكيرة وبيحاول يكون الفزلوك إللي مفيش حد زيه ونابغة الزبياني ، الناس بتضايق منه وبيحطوه في دماغهم ، غيرة بقي ، ما إنت عارف ثلاثة ارباع الشعب المصري منفسن ، دا حتي لو ملقوش حد ينفسنوا عليه ، بينفسنوا علي نفسهم ، انا صحتي كويسة تلاقية جاله إسهال ، نزلة برد ، ألام في البروستاتا ، إيه القصر المحترم اللي عندي دة ، يقوم يولع ، عموما يا عم الباشا قول كلام موزون حتي ولو كانت المصارحة هتقلب مصارعة ضدك ، لازم تتحلي بشجاعة الفرسان ، مش إنتي إقتحمت ، طيب خايف من رد الفعل ليه ، طيب مكنتش تعمله من الأول ، إنت خايف كل الصحفيين في مصر يغلطوا ده من وجهة نظركوا ، قوموا يروح يخلوا النقابة ملاذ .

طيب أخبار النقابة ايه هي قلبتها فندق ، طيب الليلة بكام ، أوعي تقولي ب ٣٧٥جنية ، والله ما أنا حاجز عندكوا ، يا باشا كان ممكن تدخلهم بالدخلة دي ، إنهم محولين النقابة لفندق وأظن ده مش موجود في القانون ، دا إنتي كنت هتقبض علي النقيب ومجلس الإدارة ، والجمعية العمومية ، وعلي نقابة المحامين إللي جنبهم عشان سيبنهم يحولوها لفندق ومدخلوش وبرضوا تقبض علي مجلس إدارة نادي القضاه ، لا دي صعبة شوية ، لا هما اللي بيقبضوا عليكوا ، دا معاهم صلاحيات ذي الفل ، مش الصحفيين الغلابة .

هو برضو النقابة غلطانة إنها بتأوي اتنين من العناصر الخطرة علي الأمن العام ، ده حتي شيلين أكبر أسلاحة ” القلم ” ، ” المخ ” ، ” اللاب توب ” ميصحش كدة دول مجرمين في حق الوطن دول مآلهم السجون ويتحطوا في قبو ٩٧ متر تحت الأرض وميشفوش الشمس لمدة ٣٣ سنة لحد ميبقي عندهم ٦٠ سنة ، جتهم الأرف بلو البلد هي ناقصة إرهابيين ، طيب نحطهم في الكبة ونفرمهم ونعملهم حوواشي ، نحطهم في الزيت المغلي ونطلعهم ونطشهم بشوية ميه ونرجعهم تاني وبعد كدة نخدهم ” دبي ” ومن أعلي برجك فيكي يا دبي ونشأُلهُم ، وأهو بالمرة نفسحهم دول عيال غلابة .

شوف بقي يا عم الباشا أوعي تقولي التكاليف هتبقي كتير ، شوف إحجز علي النقابة فلوسها كتير ، دا عندهم أراضي وعقارات وسيولة في البنك ، وسيولة في الدم ، وإسهال ، وإسهاب في الكتابة إللي قرفاكوا وعمله لكوا كارلوا في دماغكوا

أقفلوها أحسن ، وتحياتي وسلماتي لعمي وحبيبي وتاج رؤوسنا السيد المبجل المحترم ،،،،،،،، ولا علي إيه الطيب أحسن .