أمي

شاعر الروح : على الحامدي

زعلانه ليه يامه في ترابك
شايفك حزينة مهمومة وقفله بابك
زعلانه مني وانا إلى دايما ببوس ترابك
عايزه تقولي إيه ما الدنيا خلاص بدونك
الحلو بقى مر ومفيش حلاوة للأيام بدونك
يا ريتك تشوفي حالي وتحني وتدعيلي
هم الدنيا على زاد ولا فيها ذاد بيحلالي
اي حاجة من ايدك كانت حلوة وجميلة
كبيرة صغيرة بتقسميها ميت مرة
كل واحد حبة صغيرة و متقسمة
لا في عندك كبير ولا صغير ولا حتى حيله
الكل عندك حاجة واحدة متساويه
وكنتي شمعه ليل نهار منورة و قايدة
من أذان الفجر. قايمة لينا و صاحية
للي رايح شغله وإلى رايح مدرسة
علمتينا حب الله قبل حب المدرسة
وعلمتي فينا علامة الرضا بالقليل قيمة
كل خطوة بخطيها بيقولوا فيها انت قيمة
بشكر ربنا انك امي وانك الحب والقيمة
وادعي ربنا غفرانه ورحمته لانك القيمة
زعلانه ليه يامه في منامك
ياريت اعرف وتقليلي إيه صابك
انا والله بعمل بالوصية في غيابك
بحب الكل من غير فرقه وغلاتك
أهلي وجيراني واخواتي وكل بناتك
صوتك ليسه سامعه في وداني
بتندهي وتقولي يا ابني تعالى
هات ايديك اتسند عليهم تعالى
ودعوتك ليا بالستر بسطاني
في كل خطوة اخطيها القي الخير قدامي
لكن كل شيء بعد رحيلك مر ما يحلالي
كانك الوجود والحياة وكل شئ بيحلالي
سامحينى يامه أن كنت قصرت معاكي
او مقدرتش انفذ طلبك ورجاكي
دا هم الدنيا عليا ذاد ملاني
انحني ضهري ومرر كل ايامي
وكل ما أحاول اعدل ضهري
واقوم انحني من تاني
تعبت خلاص من الدنيا وكفاني
نادي عليا وهللي زي زمان من تاني
يمكن الاقي في تربتك راحتي واماني
ولا اشوفك تاني زعلانه قدامي
خلاص كفاية يا دنيا إلى اختيه مني
انا سايبك والله ورايح لدار امي
هي الأمان والحضن والامان والدفي
ومش هقلك يا دنيا غير كلمة كفى