كتبت/ ولاء حسن
وانا لسة صغيرة أيام زمان
سمعت حكاوي كتيرة عن الجان
وعشان كدة مسكني الخوف وأسيت
ولما كان يجيني الليل اتلفت في كل البيت
والخوف هيقتلي حاسة نفس قريب مني
كان فكري ساعتها انه جني بيرعبني
يزيد الخوف وانزل تحت اللحاف في يناير
اسمع شبابيك بتتخبط وصوت من بعيد ثاير
اتاري الهوا والمطر عاملين سمر
فكرت في الخوف ازاي يكون مألوف
بدأت أكبر وفكري شاغلني
وكان ﻻزم تحدي سريع مني
اسيطر بيه ع الخوف بقيت عمري
قريت كتب عن الجان طقطقت شعري
بين الحقيقة والخيال جذبتني
وعشانها كانت بتجذبني
جذبت معاها كام جني
وقتها قلبي كان جمد
صاحبتهم وبقيت عليهم اتسند
عشان مالقتش أنسي عليه اعتمد
وادي اللي كنت زمان بخاف منهم
دلوقتي بقي كل خوفي من الأنسي
