بقلم : سماء كمال
مفيش حد سعيد وحد تعيس، فيه حد بيشوف ويعد النعم اللي حواليه ويحمد ربه عليها ويسعد نفسه بيها رغم اللي جواه من هموم ورغم اللي ناقصه من فلوس.
وحد تاني اتعود يشوف اللي مش موجود .. يشتأله ويعذب نفسه بيه .. ويوقف سعادته عليه لحد ماياخده. ويوم ماياخده حيزهده على طول ويدور على حاجه تانيه مش عنده عشان يتنكد ويكمل سيمفونية التعاسة والنكد والكآبه.
رسالة إلى كل تعيس معلق سعادة على حاجه معينه .. اسعد باللي ف ايدك تسعد. لو افتكرت ان السعادة لازم تكون في حاجه مادية حواليك .. حتتعب وحتعيش عمرك تدور عليها ومش حتوصل.
ولو افتكرت ان كل انسان سعيد حواليك معندوش منغصات ولا مشاكل، احب اقولك غلطان، هو بس عرف ازاي يكيف نفسه ويسعد باللي ف ايده،
السعادة ببساطة جواك انت .. بقبولك وتقبلك لظروفك وسعادتك باللي ف ايدك مهماً كان .. بحبك لوضعك الحالي ورضاك بيه .. برضاك عن شريك حياتك ومستوى عيالكم في الدراسة.
سعادتك سيدتي
في ضهرك المكسور طول النهار في البيت وجريك ورا العيال وصراخهم وضحكهم لانها عند غيرك نعمة ومحروم منها.
بالأزمة اللي بنقابلها اخر الشهر واحنا بنحاول نضبط الدخل مع المصروفات عشان نكفي الشهر. وبدخله العيد ولمه العيله ووجودك وسط امك واخواتك في بلدك وغيرك محروم ومتغرب بعيد عنها وراضي بذكريات قديمة وبيحاول يكون سعيد ويشوفها حلوة
أكيد الطموح للأعلى سعادة .. لكن بيتحول لتعاسه لو تم على أكتاف غيرك أو بحسد غيرك .. ارضى وبعدين كمّل وحتوصل أسرع.
تصالح مع نفسك وحتجيلك السعادة تجري. قدر نفسك وحس انك حاجة جميله ربنا ابدعها ومش متكرره .. خد بالك منك عشان ربنك يتم سعادته عليك لما حتقدر خلقته وابداعه فيك. تأكد أن سعادتك لما تلاقي نفسك .. وتأكد انك حتلاقيها لما ترضى عنها وتسعد بيها زي ماهي.
وعشان كده بدل ماتعيش اللي باقي وانت محتار ولسه بتدور على السعادة وشغال سخط وندم، حاول تفكر في اللي ف إيدك مش في اللي في ايد الناس، حاول تشوف اللي معاك مش في اللي نفسك فيه.
طموحك وسعيك أكيد مطلوب لانها سنة الكون .. المهم متعش عمرك تسعى من غير ماتكون راضي باللي انت فيه دلوقتي ..
عشان عمرك ماحتشبع مهما سعيت ومهما ربنا رزقك لان سعادتك جواك أنت مش ف اللي حواليك.
