ضابط يحال للتأديب بعد أعتراضه علي انتهاكات الداخلية علي صفحته الشخصيه بالفيس بوك
كشفت جريدة العالم الحر أحالة الضابط احمد رضا للتأديب بعد نشره اعتراض علي سياسات الداخلية وقمعها للمواطنين نص البوست ((
حقول كلمتين….قبل ما اقلع البدلة الميري( توكلت علي الله)
يعني ايه ضابط أو جندي
شرطة ولا جيش
يمسك سلاحه ويصوبه علي شاب مصري (ابن بلده)
اعزل …بينادي بحريته…ميملكش غير فكره وصوته
لا هو حرامي ولا سفاح ولا تاجر مخدرات
ساعتها هنا لازم…نقف ونقول…ياظابط..شرطة كنت ولا جيش
(انت وظيفتك تحمي فكري ورآيي وصوتي….لا وكمان توصله للمسؤلين…حتي لو المسئول كان الرئيس )
(انت وظيفتك تنصفني …تحمي ظهري…وانا بطالب بحقوقي…وانا بطلب حريتي في بلدي)
اسمع صوت المواطن …وهو بيقولك
انا المواطن اللي اتخصم من قوت عيالي رصاص سلاحكم
عشان تحموا عرضي وتحموا بلدي
فبلاش اول ما أعلي صوتي….الاقي رزقي وقوت عيالي رصاصة تكتم كلامي
عقيدة جيشي وشرطة بلادي
ما تصوبش سلاحك…علي ابن بلدك
حتي لو كان في ده نهايتك
خاف لما يجي يوم…مش حتلاقي حد جنبك
وساعتها لوزير بينفع ولا رياسة
حتتسال لوحدك..عن قتل روح…كانت بتصرخ…فاكرك حتنصف
فكر قبل ما تطلع رصاصة…في رصاصة تقتل عدوك ورصاصة توجع سنين…افتكر ان اللي واقف قصادك…ممكن يكون اخ ليك…بيتباهي ويقول لولا اخوي….بلدي ممكن تضيع…وأنت وفي لحظة شاردة…تلاقي اخوك ميت قتيل…برصاص سلاحك…اللي فاكر انه كان حماية ليه.
اللهم احفظ بلدي وجيشها العظيم.اللهم اجعل جندك لا يحيدوا عن الحق….ويكونوا هم سببا في نصرة الحق )) .
