عايزة تعرفى كمان إزاى تفهمى الطرف الآخر وتفهمى سبب تصرفاته وكمان سبب رد فعلك وتصرفاتك إنتى كمان ،
نقول السبب التانى:
لازم تفهمى وضعك فى أسرتك قبل الزواج كان إيه يعنى كنتى الكبيرة والكل بيعتمد عليكى ومتعوده تعملى كل حاجة وتتحملى المسؤلية يعنى ساعات كان والدك بيقولك أنا سايب ورايا راجل ،
أيوا حصل عشان كدا اتعودتى تكونى القائد أو المدير اللى بيعمل كل حاجة وبيوجه اللى حواليه لأنهم كانوا إخواتك اللى أصغر منك فالوضع طبيعى بس بعد الزواج الأمر مختلف لأنى فى مدير تانى هو اللى هيقوم بالدور بتاعك فهيحصل خلاف لأنك متعودتيش على كده،
إنتى اتعودتى على إنك راجل البيت بس الموضوع إتغير دلوقتى عشان كدا لازم تعرفى إن دورك تساعديه على الإدارة الصحيحة عشان تنجحوا مع بعض فلازم يكون فى إتفاق إن المسؤلية مشتركة بينكم لأن الزواج شركه أقيمت بعقد زواج
لازم الشركة تكسب عشان إنتو الإتنين تكسبوا لأن فى الزواج مفيش واحد يكسب وواحد يخسر لا، لازم إنتو الإتنين تكسبوا عشان الشركة تنجح وتحصدوا ثمار نجاحكم .
بعد ماتفهموا انتو الإتنين النقطة دى نكون خطينا الخطوة التانية فى طريق التواصل الجيد والفعال واللى هيقلل من الخلافات الزوجية .
