د/هبه أشرف دياب
همسة فى اذن كل اب وام جملة بنسمعها كتير تستوقفنا نقطة مهمة وهى ابني عدواني … اعمل إيه يعنى إيه طفل عدواني ؟؟؟؟؟؟
طفل عدواني يعنى بيضرب زمايله أو اخواته بدون سبب , أو ممكن يضربوه براحه أو يزعلوه بشكل ما يستاهلش يردهالهم ضرب عنيف أوى بشكل فظيع.
ممكن تلاقيه نشاطه كتير شويه فى البيت ممكن يكسر ويبوظ حاجات فى البيت أو يضايق الناس فى الشارع أو فى المدرسة أو الحضانة بدون سبب , بيبقى مبسوط لما يلاقى حد بيعيط لما يضربه أو حد يضايق لما يبوظله حاجه أو يكسرله حاجه . طيب نعمل معاه إيه؟؟؟؟؟؟؟؟؟؟
قبل مانسال نعمل معاه إيه لازم نعرف ابننا ده بقى كده ليييييييييه؟
هل طول عمره هادى وفجأه بقا كده ؟؟؟؟؟؟
يبقى ندور على السبب ونعالجه هل هو طول عمره شقى وعدوانى ؟؟؟
يبقى ندور ايه وصله لكده مدلعينه مش بنعاقبه على اى غلط يعمله ؟
أو بنشجعه على الشقاوه؟
هل الطفل عنده نشاط زائد ملحوظ؟
يبقى نكشف عليه طبيا لازم له علاج مع التقويم بتاعنا .
لازم ندور على السبب ولكن فى كل الحالات الطفل العدوانى طفل محتاج حاجتين ( اهتماااااااام – وضبط لسلوكه)
عامل بالظبط زى المواطن اللى حاسس أن حقه مهضوم فبيعمل ثوره بيقول حد يعبرنى حد يقولى احنا معاك , ممكن يبقى سلمى فى تعبيره وممكن يبقى عنيف بس فى كل الاحوال لازم يعمل قلق عشان يحسسنا انه محتاجنا .
يبقى اولا لازم نشوف لو الطفل عنده نشاط زائد بشكل ملفت وماقدرناش نعمله تمارين تثبيت أو ماجابتش معاه نتيجة على اقرب دكتور مخ وأعصاب واكشفي عليه ومع العلاج تيجى الخطوة التانيه اضبطي سلوكه وخليكى قريبه منه حنينه عليه بس حنيه وقت مايكون مؤدب لو عمل حاجه غلط أوعى تضربيه ضربه هيزود عدوانه عاقبيه بعدم الاهتمام فى الوقت اللي تهتمي أوى باخوه أدامه وتقوليله لو مثلا قلت آسف عشان عليت صوتك وكررت تانى بأدب اللي قلته وأنت بتعلى صوتك هالعب معاك أنت واحبك أو هأجيبلك كذا
( اى حاجه بيحبها ) بس باريت خلى الثواب المعنوي اكتر عشان مايتعودش يأخد ماديات .
طيب ويعنى ايه تمارين تثبيت ؟؟
دى معناه اننا نثبت الطفل فى مكانه ولو دقايق حتى كل يوم ممكن نخليه يربع ايده ورجله شويه ولو رفض ممكن تبقى بالقوه اننا نمسكه اول مره هيعيط مش مشكله ممكن نلاعبه ونهزر معاه وهو كده ومره فى مره هيتعود وهيقل نشاطه ممكن كمان نعملها بطريقه تانيه على شكل لعبه نحط على ايد الطفل مكعبات وعلى راسه مكعب ونقوله هنشوف مين مش هيخلى المكعب يقع من على راسه ولا ايده وممكن كمان تثبتيه مكانه بالعاب مفيده تخليه مثلا يقعد يركب مكعبات أو صلصال يطلع فيه طاقته العدوانيه كمان أو يلون ويرسم .
وخدى بالك الطفل العدوانى طفل جواه طاقه كبير خليه يطلعها فى الالعاب والرياضه وانه يساعدك فى شغل البيت .
وشوفى لو عنده مهارات قياديه خليه وياريت نساوى بين ولادنا فى حبنا ليهم واهتمامنا ليهم بلاش ندلعهم زيادة ولانقسى عليهم وزى ما قال ربنا سبحانه وتعالى ( ولو كنت فظا غليظ القلب لانفضوا من حولك ) صدق الله العظيم
