شـــعر/ عاصم السمان
فينك ياليل يابتاع زمان
فينك ياضى
فين القمر ؟
لما كان بيلعب ع الحيطان
فين السواقى والنوارج ؟؟
فينك يافلاح الغيطان
لساك ياناى جدى الحزين
صوتك مسمع ف الودان
لساك ياصوت جدى
بتسرى ف المكان
همسك غنى .. نفسك امان
يرحم ابوك
يرحم ابوك يا اللى تقول اليوم انا
انت سراب
انت خيال
انت اللى ماشى تحت ظل الهيمنة
كل الوشوش اتبدلت
واتغيرت كل الاماكن
حتى القمر ف الضى داكن
والشمس اصبح لونها داكن
حتى الامل ودع حياتنا واندفن
من غير كفن
لما الحياة بقى لونها داكن
********
