شعر/نادية البسيونى

وسع وسع للعكروت
الساحر من إبرة يفوت

يقدر يعمل م الفول توت
ويحول توتة لعنقود
والعنقود يضرب ع العود
ويغنى لك
توت توت
وسع وسع للعكروت

هاتشوف فيل نونو صغنتوت
يتدحرج ويقوم مقلوب
والآخر يلبس فى البوط
ويغنى لك
توت توت
وسع وسع للعكروت

هايخبى البحر ف صندوق
والصندوق يبلع كام حوت
والحوت يبلع كام سحتوت
والسحتوت يخرج ويقول
توت توت
وسع وسع للعكروت

هاتشوف الحبل المربوط
يقلب لك تعبان مقرود
يتنطط زى الكتكوت
ويشيل فوق راسه الدبدوب
ويغنى لك
توت توت
وسع وسع للعكروت
الساحر من إبرة يفوت