علي وضعك ياريس
في حوارى المشترك مع احد كائنات كوكب الارض وهو كائن مشمئز ينتمي لفصيله طبلي طبل يا حبيبي ومصلحتي اولا وكنا جالسين علي احد مستودعات الشاي ولاننا اخر الشهر وتملئ جيوبنا ثقوب المصاريف والاسعار او علي بلاطه يا اخوانا بدون تذويق للكلام احنا مفلسين طلبنا واحد شاي بشفاطين والحاج ابراهيم الحرامي قعد يبصلنا ويمصمم شفايفه وكأنه عاوز يقول كلمتين واقفين في حنجرته بس خلينا في موضوعنا صديقي الكائن القوقازي عرف اني هكتب مقاله جديده قالي انت ياض يا ابن عبدالكريم عاوز تكتب مقال ساخر عن الريس بصتله كده وانا عاوز احط ايدي علي بقه واقوله اسكت الله يحرقك انت بتسيح المهم رديت عليه قولتله انا اكتب عن الريس حااااااشاااا وماااااااشا وانا يا صديقي اجي ايه جمب الكتاب الكبار الاستاذ ابراهيم كوله وعلي بشله وحسنين مشرط انا ياعم علي باب الله انا كنت بتكلم عن الريس في الشغل عموما يعني مثلا عندك السيد الرئيس ربنا يكرمه ويكثر من أمثاله مش مخلينا محتاجين حاجه خالص دة بيشتغل لوحده ياراجل والله وسايبنا احنا ننام براحتنا وانتخ بالك انت لو ابوك نفسه كان زمانه رزعك قلمين وشتمك شتيمته المشهورة وطلعت جرى في الشارع من غير البنطلون بس هنقول ايه احنا مش بنحمد ربنا ع النعمه الراجل ده مثبت الدنيا كلها بتاع روسيا كل اما يروح تلاقيه واخد زياره جامده سمن بلدي فطير ورز ومكرونه بصراحه مغرقه جمايل يروح امريكا ياخد معاه زياره انقح من اللي راحت روسيا افخم انواع الفاكهه والله بياخد فاكهه كده معرفهاش الكيلو منها يعمله ٣٠٠جنيه واشي مورز علي تفاح علي بلح وبياخد معاه كراتين لبن معرفش ليه المهم يعني الراجل عامل علاقات بقي وكده وهيه الحياه ايه غير علاقات مش مهم احنا ناكل او تشرب لا حاسب المهم الريس يظبط الدنيا والمثل بيقول ايه اهم من الشغل ظبط الشغل اصحي ليغفلونا يا ابن المفقوسه .
الكائن صديقي مش عاجبه كلامي وقالي انت بتطبل يا ابن عبدالكريم قولتله انا اطبل انت تعرف عني كده طب هقولك علي موقف بالصدفه وحياه مقابلتنا دي اللي بميعاد يا شيخ الجمعه اللي فاتت الست بتعتي كانت بعافيه شويه ادلعت شويه كده وهي تعبانه قولتلها ايه ياحجه انتي مش تعبانه قالتلي وافرض يعني اني تعبانه مش ادلع جوزي حبيبي طبعا في هذا التوقيت قولتلها طب خليكي تعبانه علي طول اتاريها عوزاني انزل السوق اشتري حاجه البيت دخلت اوضه النوم جابت ١٠٠٠عشان شويه خضار وقالتلي بلاش لحمه مضرة بالصحه قولت الفلوس دي كلها خضار بس المهم نزلت السوق لقيت الاسعار ايه في النازل والله كنت عاوز اروح البيت الاول ارجع الفلوس ومن كتر الرخص وحياه غلاوتك عندي راجع في جيبي ٩٩٩٩.اه والله زي ما بقولك خضار بس وربنا وكل ما تسألني جبت دي بكام اقولها معلقها انت فاكر ايه .بس مراتي بقي طلعه ناصحه وقالتلي طب فين الفلوس قولتلها اسكتي مش طلع عليه ولاد حرام ثبتوني وخدوا مني الفلوس وحياتك عندي كنت عاوز اعملك مفاجاءه ووريكي شطارتي بس عينك ماتشوف الا النور راحت راقعه بالصوت ولمت علينا اللي يسوي واللي ميسواش وكتبتني ايصال امانه بالمبلغ وحياه ابوك مالقيش معاك الف جنيه سلف لاول الشهر
طبعا انت مقشفر بس مش مشكله المهم الريس قاعد في القصر علي وضعه ابن موزة يحصل عنده انقلاب يعيطوا ويقولوا الريس بتاعنا اللي عمله باشا بقي علي وضعه مظبط الدنيا ابن اوردغان الجيش يستولي علي الحكم ويطلع يجري يقول الريس بتاعنا اللي عملها مع أن الراجل كان قاعد بياكل مسقعه في اليوم ده عاوزين يطلعوا اشاعات ع الراجل بسبب وبدون سبب بس مش دي المشكله المشكله هنا عندنا احنا قولي ليه اقولك ليه لان الشعب ده مش عاوز ريس واحد عاوز ٢٣ ريس من نوعيه الراجل ده عارف الراجل ده عمل مشروعات تتعمل في خمسين سنه عملها هوه في ٣سنين بص مش احنا مفلسين اهوه عادي اهم حاجه الريس يبقي علي وضعه عارف انت المشكله ايه أن البلد دي بتجيبلنا ناس رافعه شعار التطور الطبيعي للحاجه الساقعه المهم يبقي دكتور او مهندس وخلاص ويرموه علينا في اي وزاره يقشر علينا البتنجان ويعملنا مسقعه بقي معندوش اي فكر خالص شهاده واخدها بالحفظ بس وده حافظ مش فاهم وهيودينا في داهيه لا ده ودانا خلاص بس اقولك مش مهم المهم اني مبسوط وفرحان عشان شوفتك متنساش تحاسب ع الشاي عشان مش معايه فلوس وعلي وضعك ياريس والله ما انت قايم انا عارف السكه .فله بالآتي
بقلم الساخر هاني عبدالكريم
