الساخر هانى عبد الكريم يكتب , إقتراح خزعبلى

اقتراح خزعبلي

موقف غريب اتعرض له من صاحب البيت او اتحاد الملاك بصراحه وعندي مشكله عويصه مع الحاج فكري انه كل اما يفكر بيفتكس ويحرم دمي

اخر اقتراح خزعبلي اقترحه الحاج فكري عضو اتحاد الملاك انه الساكن اللي يسقط سنه يدفع عشره الاف جنيه عشان صيانه البيت بصراحه المفاجاءه اذهلتني الراجل عصر الجمجمه وحضر عفاريت افكاره وطلع علينا بالاختراع الخزعبلي ده

 علي اساس ان اللي بينجحوا في البلد دي بيفهموا اصلا هما درسوا ايه واتضح فيما بعد ان صاحب البيت مزنوقين في قرشين بعد جمعيه حفر الترعه وصبح ع البيت بجنيه ولاني بسقط كل سنه ثلاث اربع مرات حسيت الحاج فكري الله يخرب بيته بيقصدني انا وكأني جوز امه مش واحد من البيت فقررت والحمد لله اني اواجه الحاج فكري

واقعد معاه واقترح اقتراح خزعبلي وده كان نص الحوار مساء الخير ياحج اهلا يا اخويه عاوز ايه خلصني مش فاضي ياعم بالراحه علينا مالك طالع فيها كده ليه قولي هنا انت ازاي تقترح تغرم اللي يسقط عشره الالاف جنيه ايوه ياحبيبي الفشله اللي ازيك لازم يتربوا ياعم خلي لسانك حلو بدل ما امد ايدي عليك تمد ايدك علي مين يا ساقط انت عليك يا حبيبي يعني انت سبت مشاكل البيت كلها ومسكت في اللي بيسقطوا اه طبعا ان كان عاجبك بص انا مش هرد عليك بس عندي ليك مجموعه اقتراحات مناسبه للمرحله وفي الجون قول يا بلاص المفهوميه طلع يا مقطف الافكار اشجيني يا اخويه بص يا فكري افندي افندي ايه يا فاشل قولي يا سياده النائب ياعم نائب ايه بلا وكسه خليك معايه والله عندك حق كمل كلامك بص يا معلم

بدل ما انت عمال تقلب عيشك مع الساقطين هقولك علي حاجه حلوه تخدم البلد بجد بجد يا وله طب قول قول بص ياحج ايه رايك لو طبقنا الغرامه دي علي اللي يتجوز علي مراته او يطلقها وبكده نكون قلينا نسب الطلاق وكل ست اطمنت ان جوزها ليها لوحدها يا ابن الايه يا لعيب فكره والله لا استنا ايه رايك كمان لو دفعنا اللي يرمي زباله في غير الاماكن المحدده مبلغ 500جنيه عشان تفضل بلدنا نظيفه تصدق ياض انا طول عمري بحبك لا واضح ده انت عاوز تشرب من دمي انا عارف بصراحه اه بس كمل كمل المهم خلينا في موضوعنا عشان انا عارف ان عرق المفهوميه عندك ناقص ومحتاج توجيه اه والله يا حبيبي مستني بتاع الدش يجي يظبطلي الطبق ما انا عارف المهم عاوزين ندفع الناس اللي بتمشي عكس الطريق والتكاتك مبلغ 2000للمخالفه

وكمان كل واحد يسمع النشيد الجمهوري وقت ماتش المنتخب ومش يقوم يقف 1000وكل واحد بيكسل يشرب من الكوبايه ويميل يشرب من الحنفيه ويقرفنا من الكولدير اللي علي اول الشارع يخرب بيتك ده انت طلعت واد جن ياعم اصبر بس كمان عاوزين نركب عداد كهرباء لكل عربيه بتولع نور واللي مبتولعش برضو اهو يدفع فلوس الزباله

رخامه كده وخلاص يا سلام يا سلام دلعني دلع عيني بص يا سيدي رسوم عشر جنيه كده لكل واحده ناشره غسيل في البلكونه رسوم نشر غرامه خمسين جنيه لكل راجل ماشي مع مراته وسايبها شايله البيبي وعامل فيها بيه رسوم البهويه يا لهوي يا لهوي يا سلام عليك يا واد ده بعد الاقتراحات دي همسك الاتحاد مكان الحج علي استنا بس غرامه لكل نائب عشرين جنيه عن كل فرد في دائرته

في حاله عدم حل مشكله من مشاكل الدايره الله يخرب بيتك فصلتني روح ياشيخ يارب تموت .