بقلم : نسمة المرسى
-ليه الجواز عن حب
عشان اما يلمسني أحس بلمسته وأكون عايزاها
ومن نظرة أقدر أفهم كلام كتير عاوز يقوله بس مطلعش ع لسانه عشان لما يرجع من الشغل وأستقبله بحضن وضحكة قدام عيالي محسش إن عيب الولاد يشوفونا كدة لا بالعكس يكونو مبسوطين ان بابا وماما بيحبوا بعض ،
عشان لما يكون مش معاه فلوس نكمل بيها بقية مصروف البيت أطلعله بالفلوس اللي أدهالي من اول مكافئة في الشغل فيتبسط ، عشان لما يقعد مع أهلي يكونوا حبينه ويعتبروه واحد من عيالهم من كتر مانا بشكر فيه وفي معاملته ليا في ضهره
عشان لما يزعلني وأقعد أعيط يجي يبوس راسي ويقولي أنتي حبيبتي أنا أسف أحس بندمه فعلا فنتصالح ومنامش زعلانين من بعض
عشان لما أغلط واكون خايفة من انه يعرف اروح أنا واقوله ورده يكون أنتي بنتي في واحد يزعل من بنته عشان غلطت برضو
عشان لما أتخانق انا وهو مجريش احكي لأهلي واقولهم أنتو السبب لا أحنا بنحل مشاكلنا مع بعض
عشان لما الدنيا كلها تكون ضدي أهرب لحضنه أستخبي جواه ، عشان لما حد يقول عليا كلام وحش يقطع لسانه ويرجعلي كرامتي ، عشان لما يتقفل علينا باب واحد محسش انه غريب عني
عشان لما اتعب هو اللي يفتكر يديني الدوا ويعملي كل حاجة وميقرفش مني
عشان لما يشوف واحدة احلي مني ويبص عليها أكشر واتعصب فيبوس أيدي ويقولي انا معايا أحلي واحدة في الدنيا وغيرها ميهزش مني شعرة ف اضحك وانا عارفة انه كداب
عشان اكون مستقوية بيه ع الدنيا وحاسة ان ليا ضهر أتحامي فيه ، عشان لما عيالنا يكبروا ويشفوه بيناغشني يضحكوا ويتمنوا يعيشوا حياتهم مع حد بيحبوه زينا
عشان كل اللي يعرفنا يقولنا يابختكم
– ده اللي هصحي كل يوم علي وشه .. هبقي عاوزه اصحي اصلا علشانه ..
حد ممكن اقفله ف المطبخ طول اليوم ف الحر من غير مااحس بتعب علشان اعمله بس اكله بيحبها ..
علشان ده اللي هتعب ادامه واسخن واخرف وارجع ويقف يسندني لو مش حب هيقرف ويقف بعيد ..
لما مبقاش قادره امشي يشيلني .. يبقي فاهم اد ايه الدنيا بهدلتني ..
ابقي واثقه انه هيشوف عيوبي كلها وهيحبها ..
لما اعيط يطبطب عليا ويضحكني وياخدني ف حضنه مش يقول عليا نكديه ..
يبقي عارف كل نقط ضعفي ويقويهالي مش يذلني بيها .. هيتجوزني بيحبني وفاهمني وعاوز يكمل معايا حياته ..
