كتب :حسام داود
قالو زمان الدنيا حظوظ
دنيا بتضحك لما تعوز
مابتضحكش غير بمزاجها
لو مش عايزه بتضرب بوز
ماتفكرش إن إنت هتقدر
تضحك لو بالغصب عليها
أشطر منك حاولو وتعبو
وغيرهم ياما إتحايلو عليها
بس الدنيا دى ماادتهومش
حاجه ماهيش راضيه عليها
دنيا وليها حالات وحالات
تديك حاجه تاخدها حاجات
ممكن تدى فى يوم ماتخدش
لما يجيلها مزاجها ساعات
ولو بزياده الدنيا اديتك
صون النعمه ودارى عليها
ماتفكرش تقول دى شطاره
وإنك يعنى ضحكت عليها
هتقلب عادى عليك فى ثوانى
وإنت هتندم لما تعانى
وترجع تانى تحايل فيها
تحايل ولا تعاند فيها
تبقى ملاك أو تبقى الديب
ماانتش واخد إلا نصيبك
دنيا وفعلا حالها غريب
مالهاش سكه وملهاش باب
كنت غريب أو م الاحباب
مهما الدنيا هاتضحك ليك
برده هتفضل عنها غريب
فكر فيها تقوم نسياك
ولما بتنسى تقوم فاكراك
وكمان تبقى تبقى من المحاسيب
