سجال ثنائي بيني وبين زوجي الشاعر وليد الأصفر …بعنوان …
الغيرة …
ملك الاصفر
ملك
يسعد مسا السهرانين
ومني ألف تحية
وان شالة بهالسهرة نكون
نحنا وإنتوا أهلية
يسعد مساكن
وليد
يا قلب بعدك حافظ من عنادها
ومعذب بشوفتها برياض بلادها
مالي جلد عالحزن يا ربعي أنا
حامل جفاها مع جفا حسادها
مسيكن بالخير
ملك
حبيبي يا ورق الغار
و يا باقة فل وأزهار
بدي بقلبك وحدي ضل
وتكتبلي أحلى الأشعار
وليد
قلبي واسع بحمل عشرة
وأشعاري بتعبي السهرة
بخاف يقولولي مركوب
مرتو حاكمتو يا حسرة
ملك
الغيرة نار بتكوي جهار
لا تخلي قلبي محتار
لا تحاكي نسرين ومي
وتخليني ولع نار
وليد
نسرين ومي والهام
مابيعنولي لو شفتن
جيران وما فينا انكش
وشو يعني لو حاكيتن
ملك
لاتشرق ولا تغرب
وعالحلوين أوعى اتقرب
خليك عندي وحدي وبس
وعلاقتنا لا تخرب
وليد
مافي حلوة بهالحي
متلك يا حبقة عالمي
بعمري ما فارقتك لحظة
ولا ببعد عن إيدك هي
ملك
حلمت بأحلى الأحلام
وخليتك بعيوني تنام
لا تفوق قلبي عالغيرة
وخلينا نعيش بسلام
وليد
خير انشالا يا حلوة
حلمك خير علينا دوم
ما رح اغفى عنك غفوة
ولا تزيدي على قلبي اللوم
ملك
حاج تلف وحاج تدور
وتبنيلي من الوهم قصور
المحبة ود وإخلاص
مش لعب ورا الضهور
وليد
متهوم وعندي برهان
وعمري مالحقت النسوان
من شغلي برجع عالبيت
وبقعد مع أربع حيطان
ملك
حسسني بالحنية
ولا تكون أسي عليي
وعاملني بالإحترام
بتبقى بقلبي وعينيي
وليد
طلباتك ياست الكل
على راسي منتور وفل
وانتي عيوني وتاج الراس
كل ماشفت خيالك طل
ملك
خليني دوم بقربك
وسمعني دقة قلبك
لا تروح وتبعد لبعيد
وتدوبني بحبك
وليد
أنا جنبك ماصرت بعيد
وكل ماشفتك عندي عيد
وإذا ضحكت عينيك نهار
قلبي بيغرد تغريد
ملك
لا تقلي راعي ظروفي
القصة صارت مكشوفة
إنت بتحب الحلوين
بقولا ومني مكسوفة
وليد
بحب الحلوة بالسبعين
لكن واقف على حدي
ما بحاكي أحلى الحلوين
وهي مرتي الحلوة حدي
ملك
مبارح شفتك جنب البيت
عاملي روميو وجولييت
عم تضحك مع جارتنا
ولمن لمحتك جنيت
وليد
مبارح سألتني الجارة
ليش وحلتوابهالحارة
ضحكت وقلتلا بردون
كنتكن شطفت دارا
ملك
واعدني وعد من سنين
تبعد عن كل الحلوين
وكل ما شفت صبية
بتهديها باقة ياسمين
وليد
وحياتك يا مرتي صار
قلبي من الحامض لاوي
ما بعرف شو يلي صار
ومابعرف شو رح ساوي
ملك
لا تقلي اللي بالك بال
وبسرعة تجاوب بالحال
ولا تبررلي أعمالك
بطلي هاد الموال
وليد
إن كانت الغيرة هيك
الغيرة طبعا سلبية
أعمالي كلا بالعقل
ومش رح زغزغ النية
ملك
انا كتير بغار عليك
من الهوا يلي حواليك
وحتى من وردات الدار
لما بتلمسها بإيديك
وليد
يا حلوة لا تقولي هيك
والنار بقلبي تقيدي
الغيرة متلا متل الملح
كميتا أوعي تزيدي
ملك
إبعد عن شي بيأذيني
إنت بقلبي وبعيني
ما بدي غيرك إنسان
وبدي منك تحميني
وليد
لسا المودة بالقلب
ولسا اللهفة الحنونة
أنا بطلع خلقي من الغلب
لكن إنتي بتموني
ملك
أبدا لا تجور عليي
ولاتثير الغيرة فيي
خليك عوني بهالزمان
تا تبقى غالي عليي
وليد
على راسي أنت وبالقلب
حطي بطيخةصيفي
رح صونك وحياة الرب
غيرة انشالة ماتشوفي
ملك
إسمع مني شو رح قول
بدي تضل جنبي على طول
وحطك بإيدي إسوار
وتعاملني بالمعقول
وليد
قولي السامع مش مخبول
ولا أخد كاسة شراب
تكرم عينك بالمعقول
إنتي يا أغلى الأحباب
ملك
رح قول وكلي حماس
إنت يا جوهر إلماس
إنت على قلبي بتمون
يا أغلى من كل الناس
وليد
بحلفلك بالمنصوبة
وبكل حجار الكعبة
قلبي بهواكي مكبل
و بعرف إنو مش لعبة
ملك
رح صب الشهد بهالكاس
وصفي النية والإحساس
وقلك يا شريكي بهالدرب
إنت عيوني وتاج الراس
وليد
سبحانو ربي الخلاق
ما أجمل خلقو وأحسن
مرتي تاعبتا الأشواق
ورباط الإيد الأمكن
ملك
أنا وأنت يا حبيب القلب
مشينا سوى بوسط الدرب
إيدي بإيدك يا محبوب
من الغيرة ينجينا الرب
وليد
هاتي إيدك يا حلوة
نمشي مع بعض بهالعمر
بدرب الهامة والربوة
لو كان مغطى بالجمر
ملك
الغيرة عادة بشعة كتير
بتوصلنا للتدمير
الله يكفينا ياها
ونغرد متل عصافير
وليد
لا تغاري الله المنعم
وتقديره حسب المطلوب
ولا تحكي هوة الملهم
وحكمو مامنو مهروب
ملك
أنا والله بحبك عن جد
ورح صون بيناكل الود
ورح قدملك هالعربون
قلبي وروحي وباقة ورد
وليد
أنا والله بحبك كمان
إنت ياست النسوان
رح قدم قلبي هدية
ونعيش أنا وإنت بأمان
ملك
وبنهاية هالسهرة
بدي ودعكن بالخير
ورح إلكن يا أغلى الناس
تصبحوا على ألف خير
وليد
بستأذن الأخوة اللي سهروا حدنا
الشافوا بهالسهرة هزلنا وجدنا
أكتر من الساعة اسمعتوا شعرنا
ويمكن سئمتوا من أخدنا وردنا
