د.محمد أمين جاد
ممكن تحسي بالسخافة وإنتي بتعملي كدا
لكن كلامنا مع البيبيهات بيساعد في تطور اللغة ومهارات التواصل عندهم
لانه بيكَّون لهم حصيلة لغوية كبيرة بتساعدهم على فهم اللغة أسرع وفهم الكلمات دي واستخدمها بعدين
نقدر نتكلم مع الأطفال في أي حاجة وكل حاجة بتحصل على مدار اليوم، هنعمل ايه، بنفكر في إيه، ايه خطتنا للنهاردة…..
الأطفال من وقت الولادة بيمتصوا كمية معلومات هائلة عن العالم عن طريق المراقبة والاستماع
في البداية هنحس اننا بنكلم نفسنا وإنه تواصل من طرف واحد
لكن أسرع مما تتخيلي هتبتدي تلاقي إستجابة منهم
يوقف عياط ويركز في كلامك، يبص في عينك، يبتسم لك، يناغي ويضحك، يحرك جسمه بحماس لكلامك، لحد ما نوصل لمحادثة بين شخصين
خلي كلامك مع البيبي عادة، هيساعد في بناء عقله، ويقوي العلاقة والتواصل بينكم
