علشانها بس

كتبت:نجلاء على
البنت ..
مش صوره وخلاص
دي البنت للغرقان خلاص
وأساس عشان الإكتمال
البنت بستان للجمال
ف عيونها شمس بتبتسم
وبتترسم وقت الكسوف
لوحة خجل
وانا قلبي فنان مبتدئ
مشتاق يدوق طعم العسل
إيه العمل ؟
دي البنت فاكهه ف كل حين
ومابين عيونها الطيبين
نهرين حنان
بيزغزغوا شجر الأمل
طعم الفراوله والعنب
بين المحال والمحتمل
جوايا حلم ناقصله شئ
ومعاها بس ح يكتمل
إيه العمل ؟
والبنت جوّه عيوني كون
وانا فيا طفل مناه يكون
على صدر أمه بيبتدي
يتهجا لحظات الجنون
ويعيش حياة الأوليا
لكن بإحساس المجون
محتاج أدوق طعم الجمال
واشرب حياه على كل لون
محتاج أكون صمت الكلام
محتاج أعيش صوت السكون
أهرب معاها من الزمان
ومن المكان
ومن العيون
محتاج أشم ف حضنها
عطر اللمون
وافتح دراعي واضمّها
كما ورقه حضنت سطرها
ثم استخبّت ف الكتاب
محتاج أشق ف قلبي باب
وافتح ف حضني ضلفتين
علشانها بس