سايق عليك النبى
يا عم يا عطار
يا قارى علوم
الجن والأسحار
تجاوب على سؤالى
ولاتكتم عنى أسرار
وتقول لى إيه العمل
فى تلاته من الأخيار
زينة شباب حتتنا
جمال الأعور
شاهبندر التجار
والمعلم منطح الجزار
وضم عليهم سى فجله
بياع الخضار
عملوا إجتماع قمه
وإتخذوا القرار
بدبح المواطن وشويه
على الجنبين بالنار
واللى يعترض
يبقا من الأشرار
وتهمته إنه
عدو الإستثمار
وممكن يتقال عليه
خاين وعمولته بالدولار
أو شيوعى من الكفار
ما هو إعلامنا بعيد
عنك مصاب بسعار
واللى مش عاجبه
يسيب الوطن والديار
ويتوه مع النداهه
فى وسط البحار
يا يروح لكفيل
من الأشرار
أيوه جاااااااااااااااااااااااااى
