شق النور

سلوى العيني

قطع شرايين الحياه الولد كان مبتداه نقطه وتربيعه وجذر وجسر من دمع المطر والوتر فوق الغصون

نط بجنون عتق عناقيد قصته حجِم كلامه ع الشفايف والقلب شايف نور وخيالات الوريد

حالف يحد عن سطر عشقه للقمر واللى اختمر جواه جنون عن فكره دايبه م القدر ووصفه خايبه للشعور علي ضفة الإبهام

كلام خايف ينام علي صفحته البيضه غيوم تطرح هموم زنازين وريده مقفله ومكبله ومكعبله

كل اللي هارب م الجحيم من حرف باء أو حرف ميم

بم بم طرح بلالين ودع يا دى الوجع اللى محلف دمعتى بمليون يمين

لو إنت مين خطى السواقي العطشانين وأروى فدادين الغرام الشقيانين

لبس قوافي كلمتك طربوش حنين

أخر السطور والنقطه دم في بحر بور كسر سلاسل الغرق

النور برق وإرمى خوفك علي باب الزقاق كل اللى داق من أسوتك صابه النفاق

ماتنظموش حكم الهوا للشوق دوا يدخل مسامات الشقوق

النور يفوق ينطر غطاه ويلملم اللى متبعتر ف وجعه

بألف أه ياشقاوة الحرف الرضيع

الليل منيع وراخى ستايره بأفتخار ومخلى طعم التلج نار

وأنا المداح ونفسي أرتاح علي أعتابك

وأنا الخباز لحرف الشوق ونفسي أدوق عنابك

كفايا دموع ذهاب ورجوع خرايط العمر ف جرابك

خد ألف خط وشد الأرض بوتادك وشُق النور