الدايت

د.محمد أمين جاد

أي بنت عاوزه تعمل دايت

لازم تحط في دماغها الاتي :-

1- الدايت ممكن يبدأ في اي يوم مش لازم اول الشهر او اول الاسبوع

2-الدايت مش بيبسي دايت بعد نص صنيه مكرونه بالباشاميل

3-مش معني انك بعد ماكلتي محشي وممبار وحليتي بكنافه بالنوتيلا وضميرك أنبك وندمتي ان ربنا هيرفع عنك السعرات الحراريه دي لا هتتخني وضميرك هيموت

4-مفيش حاجه اسمها اكل بيخسس يعني البروكلي والكيوي مبيخسسوش بس لو ضربتي كيلو بروكلي وحليتي ب 30 وحده كيوي هتتخني برضه.

5- الميه في نص الاكل بتطلع كرش وانتي اوردي عندك كرش والا مكنتيش عملتي دايت .

6- في الجيم متقعديش نص ساعه علي جهاز كريزي اللي بيهز جسمك كله ومتخيله انك بكده هتخسي انتي جسمك هينمل مش اكتر من الرجرجه او تجيبي حزام مش عارف ايه اللي بينزل منطقه الورك والارداف اللي علي قناه تايم سينما ومتخيله انوا هيخسسك وانتي نايمه بتتفرجي علي الشيف شربيني عاوزه تخسي يبقي تمشى تجري .

7 – اليوم الفري ممكن اللي خسيتيه في اسبوع تتخنيه واكتر في اليوم ده.

8- قبل ماتعملي دايت شوفي خطيبك او جوزك بيحب ايه في رجاله بتحب الكلبظه ودول بدأوا يبقوا كتير في مجتمعنا عشان بيحسبوها المتربي علي الغالي تمنه فيه ( ملناش دعوة بالنقطة دى)

9- لو حصل نصيب وخسيتي ياريت متحطيش صورتك قبل وبعد علي الفيس بوك عشان اصحابك المنفسنين هيقروا عليكي وهترجعي اسوأ من الاول الحاجات دي بتتنظر .

10- لو عاوزه تخسي لازم تقطعي علاقتك مع امك الفتره دي عشان هيبقي اكلها هو هو بس هتقولك اقسم بالله حاطه نقطه زيت بس مع انها دلقت نص علبه السمنه في الحله !!

او انتي “اتسفطتي” يابنتي هتروحي فين بعد كده .
ايه ده عضم وشك بان وبقي شكلك وحش!!
او دوقي بس هي قطمه هتخنك!!!
احذري قطمه واحده زي شمه واحده