يمكن العمل الحر فيه مرونة شوية في الوقت بس مش لدرجة إنك بتشتغل في أي وقت بدك إياه.. لأنه ببساطة فيه موعد لتسليم العمل (Deadline) وطبعًا أي تأخير عن الموعد المحدد يجعل تقييمك وبروفايلك سيء وبالتالي حيأثر على العملاء المحتملين، بل بالعكس فروقات الزمن بين الدول ممكن تخليك تصحى من الفجر تشتغل!
.
2. في العمل الحر بتقدر تشتغل من دون ما تمتلك أي مهارة..
طبعًا كلام بطاطا وفش منه والي حكي هذا الكلام بكون شاف فيديو عن العمل الحر وبدو يتفزلك شوية وينصحك.. من الآخر إذا ما كنت بتمتلك مهارة معينة صعب جدًا تلاقي عمل.. لأنه الناس لما بدها تدور على شخص يشتغل شغلانة فهي بتدور على واحد يضيف قيمة.. يمتلك مهارة يعملها.. ليش حكيت صعب جدًا؟ مش مستحيل! لأنه في شغلات بدهاش مهارة بس أول حاجة بتلم سنتات مقابل ساعات من العمل! وبالتالي هذا الكلام لا يعتبر عمل.. تاني حاجة حتلاقي عشرات الآلاف من الناس مقدمة عليها.. فضروري جدًا تمتلك مهارة قبل ما تفكر تدخل مجال الفريلانسينج.
.
3. أول ما تدخل المجال حتلاقي عمل بسهولة.
الأمر مش بهادي السهولة.. متل ما أنت بدك تشتغل فريلانسر.. فيه غيرك بنفس مجالك وأشطر منك وبالآلاف حيقدموا عن نفس العمل.. يعني فيه منافسة.. يعني إذا ما كنت تعبان على حالك وعندك بروفايل قوي راح تتعب كتير عشان تلاقي أول عميل.
.
4. بمجرد دخولك العمل الحر فالفلوس راح تنزل عليك من السما.. والدنيا حتكون لوز.. وخلال شهر حتلاقي 10آلاف دولار في جيبك.
خرافة لا أصل لها.. كلام تنظيري بحت.. شغل تنمية بتنجان ووهم.. لأنه العمل الحر شغل عادي بدو مجهود وتعب والشغلة نتاج عمل سنين.. مش بيوم وليلة.. والأمر مشابه للوظائف تمامًا.. فيه أعمال الدخل فيها قليل وهادي غالبًا بتكون ما بدها خبرة كبيرة أو المنافسة فيها كبيرة.. وفيه أعمال الدخل فيها كبير لكن هادي غالبًا بتكون بدها خبرة وتعب ومجهود.
.
5. العمل الحر أسهل من الوظيفة.
كل حاجة لها إيجابيات وسلبيات وغالبًا إيجابيات الوظيفة مش حتلاقيها موجودة في العمل الحر متل الأمان الوظيفي.. الإجازات.. المسؤولية.. وبنفس الوقت إيجابيات العمل الحر مش حتلاقيها موجودة في الوظيفة.
.
6. العمل الحر فخم وسهل وممتع لدرجة إنه ملوش عيوب.
أحب أبشرك إنه أكبر الخرافات المنتشرة.. ليش؟
– عشان في العمل الحر غالبًا حتشتغل من البيت وبالتالي مش حتعرف تفصل بشكل تام بين وقت الشغل ووقت الراحة.. حتتغلب كتير ومع الوقت حتضطر تشتغل من مساحات العمل الحر في المؤسسات.
– بما إنك بتشغل في البيت فمعنى الكلام مش حتتواصل مع حد غير عن طريق الجهاز.. مع الوقت حتصير إنطوائي وحتبطل تحب تتعامل مع الناس وممكن يصيبك اكتئاب ومن هالكلام!
– بما إنك بتشتغل من البيت فيعني أنت جالس أمام اللاب توب طول الوقت؟ فهمت أكيد! يعني وزنك حيزيد.. مشاكل في الظهر.. وجع في العينين.. وليلة كبيييرة ههه
– الإنسان بطبعه بحب الراحة.. وأنت فش مدير لك.. يعني أنت مسؤول نفسك.. يعني فيه أيام حتكسل فيها وبالتالي فش شغل.. يعني فش مصاري.. يعني أنت بتخسر.
– بناء على النقطة السابقة.. إذا كنت مبتدئ وبتعتمد بشكل كلي على العمل الحر.. فغالبًا حتقابل تقلب في الوضع المالي في البداية.. يعني ممكن شهر تكون رايقة جدًا.. وممكن الشهر الي بعده تكون مضغوط جدًا وبالعافية مسيطر على وقتك وعارف تمشي العملاء.
