بقلم وحيد سعود
خبير الارصاد الجويه
مش كلنا وﻻد 9 مش كده وﻻ إيه ؟..مش كلنا مصريين مش كده وﻻ إيه ؟ أشمعني هما آه وإحنا ﻻ ؟.. كلنا متعلميين .. كلنا خرجيين كليات محترمة .. كلنا أدينا الخدمة العسكرية وحق الوطن دفعناه .. كلنا طبيعة عملنا مهمه وربنا هو اللي قسمها .. ليه تأمر وتنهي فيا وفي زين الشباب وأنت قاعد ع الكرسي وفي أيد سيادتك الكرباج تقولنا شي يبقي شي وتقولنا يس يبقي يس وغير العلف مبنلقاش ؟ ليه تاخد اكتر مني ويقدروك وجنيهك حافظ قيمته مركز وقيمه زى جنابك ومتقدر غير الجنيه بتاعي الواقع أبن الكلب السكران الحيران المرضان البهتان و اللي مبقاش ؟ ليه كرامتك محفوظه بزياده وطفحه وإن غلطت أنت يسامحوك ويعذروك ويقدروك وكمان تعظيم سلام وإن غلطت أنا يعملوا عليا ليلة مفترجه وﻻ ألف ليله وليله يهنوه ويلعنوا سلسفين أمه وأم اللي جابوه ويلعنوا كمان أم الجيران ؟ ليه انت مستشفيات وعيادات ودكاتره أتقياء تتعالج صح وانا وري التمرجي والممرض أجرى وأتحايل وأقوله ينوبك ثواب ؟ ليه أنت عندك نوادى وحشيش وخضره وأماني وأنا من فقرى وقلة حيلتي عمال ألف سجارتين حشيش كل ليله يحن عليا بيهم واحد ضايع زي حلاتي عشان أنسي وأنام وأخر الليل أنده ع الواد أبني من الحارة أنادى عليه وأقوله أطلع يا صايع يا ( مقصوف الرقبه ) لكن أبنك أنت ماشاء الله سبحان الخلاق عنده حق لما نادي عليك وقالك يا دادي .. ليه مركبينك عربية وأتنين يا محترم من غير ماتدفع وﻻ حق الدخان وأنا اللي أدفع من لحم الحى وأنا ورا الأتوبيس على حسابى أجرى وأنادى وأدادى السواق ؟ ليه وليه وليه يا ( اما ) ليه ؟ يا بهيه ليه ؟ يا أم الدنيا ليه ؟ يا أم القلوب الحنينه هو إحنا مش من رحم واحد وﻻ إيه ؟ هو إحنا مش كلنا وﻻدك ولا إيه ؟ ليه فرقتي بينا ؟ ليه خلتينا أسياد وعبيد ؟ ليه خلقتي الكره والغيره والحيره والحقد فينا ليه وقعتينا وكرهتينا في بعض وبعضينا ليه وبأمارة إيه وليه ؟ عقلي شط وطار من الغيره والجوع و الفقر والمهانه والجنان أصبحت تايه فيكي وحيران .. هو مش سيدنا أدم أبوهم زي ما أحنا ولاده وﻻ إيه ؟ فهميني ينوبك ثواب العباره دى أخرتها إيه علشان الصبر مرر وخلص وفات وربنا يكفينا شر اللي آت؟ .. بس ومش هقول أكتر من كده والشكوى لغير الله مزله … يا إنسان خلي بالك بينى وبينك رب العباد اللي ﻻ يغفل وﻻ ينام والأجر والثواب عند الله وربنا يستر على اللى آت.
