لما تقضى سنين عجاف
تحلم تشوف لحظة وقوفك
لما تقضى نص عمرك
والسكوت عن الكلام مالى جوفك
لما تهرب مالحقيقة المره
مرة والف مرة جوه خوفك
ومره واحده تلاقى حلمك يتولد
زى النهار قدام عيونك
لما يشق قلب الليل ويخرج
فاضل انك تلمسه بس بكفوفك
والربيع يرجع يعود
وتعود معاه معنى الحياه بعد مادبلت طروفك
وخلاص اكيد عاد الأمل
ومالمحتمل يرجع لسانك ينطق حروفك
وفجأه تلقى الليل يعود
ويعود معاه شعور بخوفك
واتغيرت كل المعانى واتبدلت كل الوعود
ومره تانى عن الحياه يرجع عزوفك
لما النهار اللى اتولد بين ايديك
بفعل فاعل اتوئد قدام عيونك
ولو هاتحزن عالحلم. احزن جوه منك
اوعي حد فيوم يشوفك
انت اتسرقت واتنهبت واتسحلت
وحلمك الموئود شهيد واتكسرت تانى طروفك
اهو هو ده الموت بعينه. فاضل ايه !
غير انه تلبسله الكفن وتشيعك جموع الوفك
…………………………………………
مش حلم عادى اللى اتسرق
احنا ياساده اليوم على موعد
مع………………………………………… سرقه_وطن
واللى اتسرق هو الزعيم … هو البطل
واللى سرق بالحياه لبس كفن
او اختفى ….. او اتنفي …..
….او اتسجن!
مش قلب اب ولا قلب ام اللى اتحرق
ده قلب شعب حلم يكون عند وطن
ابشع جريمه فحق شعب لما يكون مجنى عليه
وتحوله فلحظه جانى ومتهم
علشان كده يوم ماتحلم بالوطن
راجع حسابك واحذف الخوف من كشوفك
ينطق لسانك مره بالأمانى مره تانى
وبالمعانى تقول حروفك.
