للي ميعرفش السيد المحترم / نبيل باشا العربي نعرفه الرجل ده من قامات الدبلوماسية في مصر والعالم العربي ، عشان كده أصبح بقدرة قادر أمين عام ” جامعة الدول العربية ” ، بعد التعريف بهذه القامة أقول ليكوا الرجل قال إيه ، طبعا إنتوا عارفين أكيد ما آل إليه الحال في الحلوة الغندورة بريطانيا والإستفتاء الإهبل إللي عملوه عشان يطلعوا من إتحاد اليورو ، ” الإتحاد الأوروبي ” يعني طبعا مش الشعب الإنجليزي إللي خد القرار المفاجئ ده ، طبعا ده كان مقصود ، ما إنتوا عارفين إن فيه صوابع بتلعب في العالم كله بس ” بريطانيا ” كفايه عليها صباع واحد إنتوا عارفينه أكيد صباع مين ، عروستي ، إللي مهيمن علي العالم كله ، إيه ؟ بتقولوا عاروستي تاني ، طيب إللي حاطط العشرة أصابع بتوعه في العالم العربي ، إللي الباشا الكبير ، كبير القاعدة الكبيرة دي بيقول إن ” خروج بريطانيا من الإتحاد الأوربي بمثابة لطمه في العمل المشترك ” والله .
طيب تساؤول هو فنجان القهوة التركي بيعمل كام في جامعة الدول العربي ، طيب كوباية الشاي الصعيدي الوصاية تعملها كام ، ولا البوفية. ” grâtuit” مجانا يعني ؟ .
وبمناسبة وصاية دي هما الناس بتوع العشرة صوابع مش عاملين وصاية علي،،،،،،،،،،،،،،،،،، ولا بتاخدوا قرارتكوا زي الأسود الشجعان ، بس سبحان الله أنا شكلي ببالغ ، هو أساسا الموضوع لا يصادف محل ، مهو من ساعة إنشاء الجامعة ، إللي هي كيان مشترك إللي معاليك قلت عليه ” لطمة ” عشان كدة أنا مستغرب هي فارقة معانا قوي كدة .
طيب أنا هقولك علي حاجة الإتحاد الأوروبي ده بيتكون من ثماني وعشرين دولة يعني بالتقريب زي العالم العربي، بس الإتحاد ده عملهم إيه ؟ هقولك عامل لهم إيه ، عامل لهم إستقرار سياسي وإقتصادي ، طيب إحنا عندنا إيه عندنا دواعش ومتطرفين وقتل وهرج ومرج وشبه كل الدول العربية حالها متنيل بستين نيلة فيما عدا دول البترول إللي ممكن مع الوقت الفيروس يصيبهم ، ما هي فعلا فيروسات لو عندنا إتحاد محترم بحق وحقيق ، مكناش شفنا القرف إللي شايفينه في عالمنا العربي ، الناس دي عندهم عمله موحدة ، زيها زي الدولار يا دوبك إسأل فنزولي ، صيني ، ياباني ، موريتاني ، بنجلاديشي ، صومالي ، هندوراسي ، هيشونباشي ” دي الناس إللي عايشة في زحل ” قول لهم عُمْلِة الإتحاد الأوربي إيه هيقولك اليورو ، إحنا عندنا عملة موحدة طيب مثناة ، طيب جبنة مثلثة ، يا عم خلي الطابق مستور .
أنا أعتقد أن الجامعة العربية الحاجة الوحيدة إللي ناجحة فيها هو تشتيت العالم العربي وتقوقع كل دولة داخل نفسها ، زي المريض نفسيا بفوبيا الضوء عاوز يفضل في الظل علي طول ، بس كلمة ظل هينه شوية ، قول في ظلام ، عشان كدة مفيش تنسيق ، وعشان كدة ولادنا بيموتوا غرقا في المياه ، وفي أجيال بحالها فقدت الثقة في حكوماتها ويمكن في نفسها ، عشان كدة تعجبت من بعض نواب مجلسنا الموأر يا رب أشوفهم متأورين بمئوار وياريت يكون حامي ، بيطالبوا بإدخال مادة في قانون العاملين بالدولة تسمح بعمل العرب في دولاب العمل الإداري في مصر في الوقت إللي للإسف إحنا أساسا مش لاقيين عمل للمصريين وفي الوقت إللي الدول العربية الخليجية بتستجلب عمالة أجنبية من الخارج تَرْبو علي الخمسة أضعاف العرب ، ودة طبعا حاجة مقززة وغير محترمة والمشكلة يوم ميشغلوا عربي من بني جلدتهم يستعبدونه بصك عبودية إسمه ” الكفالة ” .
عموما حصل خير بس وانبي يا عم الباشا متخدش علي خاطرك قوي إن شالله الإتحاد الأوربي كله يتحل ولا يولع ، العملية مش ناقصة ، وبعدين إنت خايف علي إيه ، الجامعة كدة كدة موجودة متخفش علي رزقك ، طول ما الأداء بتاعها بيتميز بالفتور والفطير بالجنزبيل ، هتبقي الدنيا وردي والبوفية هيفضل شغال وهندخل معاه سندوتشات مربة وتونة وبيض بالبسطرمة ، وهتبقي الدنيا عال العال .
