رامي البكرى 
كالعادة زى كل سنة بقعد مع صحابي نتساير في امور حياتنا وبعد كتير من الضحك وشويه مشادات وشوية تسالي فتواردت المواضيع وجيت سيرة هنعمل إيه في رمضان السنه دى وتركت السؤال للكل عشان يجاوب رد عليا واحد منهم بس بقى يازميلى لازم خطه منظمه نمشي عليها وسكت ثوانى ولاقيته اووبا ماتشات الدورى الأمريكى واهم ماتشات العالم جايا في ليالى رمضان ولازم بقي الترتيب يانجم للحوار ده ^^^ ورد علينا التانى بص بقى ياحجيج أنا ماليش في جو الماتشات ده انا سمعت شوية إعلانات في وسط الفيلم الهندى إيه عنب العنب بيقولك الأسطورة صافيناز هاتاكل الجو في المسلسلات بص بقى يازميل انا مش هافوتلها مسلسل ولا برامج المقالب ايه بقي آخر شهيصة فاحمرت عيناى غيرة على رمضان فوددت في نفسى أن يكون رد الثالث يشفي غليلي فقولت له يا صديقي وماذا ستفعل أنت في رمضان فقال لى هافاجأك ياكبيير قولت في نفسى لعله خير قال انا إشتريت فانوسين إنما إيه اللمبات اللى جواهم موفرة عشان هاسيبه شغال ليل نهار كدا وروحت بقى يامعلمى على عمك الحج حسين اشتريت حبة بلح إنما إيه بلح ولا قمر الدين مستورد من بلاد بره وجبت فرعين نوور بقي بص من اول الشارع لحد الشارع اللى ورانا وطأطأت رأسي من الخيبة وبعد ان كانت حالتى تزداد خجلا مما تسمع اذناى ازددت خيبة وكأننا نعيش حالة هزيااان هل هذا هوا رمضان بالنسبة لكم ..فهدأت نفسي بعد دقائق معدودة وتحاورت معهم فى هدوء تام أما أنا رمضان بالنسبة لى هو شهر كرمه الله بنزول الوحى فيه بالقرءان فنهاره صيام وليله قيام .إنه شهر البركات شهر الروحانيات. رمضان فيه ليلة أفضل من ألف شهر رمضان شهر الغفران فقد قال النبي العدنان صلوات ربي عليه (من صام رمضان إيمانا ..وإحتسابا..غفر له من ذنبه ما تقدم وماتأخر ) صدقت يا حبيبي يارسولى وهل هناك أمنية أروع من ذلك هوا انتم فاهمين إن الصوم هو الامتناع عن الأكل والشرب فقط الصيام أيضا صوم للجوارح واخدلى بالك انت ياض يابتاع صافيناز والمسلسلات إنت مفكر إنهم بيعملوا المسلسلات دى عشان يسعدوك ولا يفيدوك بحاجه أبدا ورب الكعبه دوول بيضحكوا عليك إنك تفتح التلفزيون وتشاهد انت والملايين غيرك ويتربحوا أرباح كبيره جدا وإنت يامسكين قاعد مكانك مش فاهم حاجه غير إنك ضيعت صيامك وخلاص إنت عارف شهر رمضان عاملين فيه مسلسلات وبرامج بكام السنه دى يفوق 3مليار جنيه وهايكسبوا أضعاف اضعافه وإنت ياغلبان انت مش هاينوبك غير الخساره في الدنيا والأخرة ضيعت صيام أعظم شهر إللى فضل صيامه كبيير وعظيم عند ربنا وإنت مسكين فرحان بالماتشات والمسلسلات وتيجى عند الفطار تملى بطنك ونسيت حتى تدعى لنفسك اسمع يا صديقي منك له كلام ربنا الحنان بيقول إيه (يريد الله أن يتوب عليكم ويريد الذين يتبعون الشهوات أن تميلوا ميلا عظيما ) إتأملوا كدا في كلام ربنا بيقول يريد الله ربنا عايزك تتوب وترجع لبابه عشان يريد رب العزه أن يتوب عليك هوا في أحن من كدا وأروع من كده عايزك ياعاصي يامقصر ياقاطع الرحم ياواكل ميراث الأقارب يامتبع الفواحش يامدخن عندك فرصه عظيمه إرجعوا لربكم ربنا من رحمتة بيقول (يريد الله أن يتوب عليكم ) إرجع يا ظالم عن ظلمك ارجع ياعاق والديك وإركع تحت أقدامهم استغلوا رمضان ياعم الحج الحسنات فيه مضاعفات أضعاف أضعاف يابنى انت وهوا بدل ماتضيع صيامك بالمسلسلات اللى مش هاتستفاد منها حاجه أصلا روح على مصحفك وامسحة من الغبار اللى عليه وجرب كدا وإفتحه أتحداك إنك هاتقفله تانى طب إقرأ كدا وجرب ذوق حلاوته في لسانك متع نظرك يامسكين بأيات الله إعزم وخذ قرار إنك تختم المصحف في الأيام العظيمه دى اغسل ذنوبك وكحل عيناك بدموع التوبه إتقن عملك .عامل أهل بيتك كويس علم ولادك فضل الشهر الكريم زور مريض زور اقاربك صل رحمك ياجدع إخرج صدقات ساعد الناس يامؤمن إركع لربنا وإسجدله في صلاتك إخضعله وإحكيله قدمله الإنابه قووله ياااارب يااارب سامحنى روح زور فقراء المسلمين وكون عون ليهم بص كدا استمتع بحلاوة الصيام كدا في قلبك وإنت يضع يا بتاع التمر والياميش وهمك على بطنك فطر صائم كدا كل يوم ولو بشق من تمرة وجرعة مايه والله ربنا بيفرح بيك تأمل كدا جوعك وعطشك وصبرك أكيد فيه حكمه لذلك إنك تحس بالفقراء إنك تأدب جوارحك على طاعة الله شوف عطش لسانك وحس بالمسكين أقولكم على حاجه تفرحكم وتستمتع بيها وانت صايم تخيل نبيك محمد صلى الله عليه وسلم بيقولك (والذى نفسي بيده إن لخلوف فم الصائم أفضل عند الله من رائحة المسك ) إنت متخيل رائحة فمك أطيب من رائحة المسك عند ربنا عايز إيه تانى بس فيه أكتر من كدا حب ربنا لعباده.. وتعالى عند ساعة الفطار إدعى لنفسك ولأقاربك بالهداية والغفران وادعى لزمايلك إن ربنا يوفقهم فى دراستهم وادعى للمرضى بالشفاء وللمكروبين بتفريج كروبهم إدعى لبلادنا والأمه الإسلاميه أن يعم عليها الأمن والأمان وإوعي تفوتك صلاة التراويح وشوف خشوع الناس اللى بيصلوا معاك اسمع حنينهم لربنا في بكائهم ياحبيبي في الله ياصديقي والله والله ربنا بيفرح بقربك منه إجعل العبادة في قلبك سبيل لسعادتك ماتضيعش فرحة رمضان في المسلسلات والماتشات وتملى بطنك باشهى المأكولات يا صديقي انت وهوا أنا بحبكم والله العظيم بحبكم عايزكم تدلونى عالخير نعمله ونكون مع بعض فى الدنياعالعمل الصالح ونكون في الآخرة مع بعض في الجنه ياأصحابي ياأهلى ياإخوانى وإخواتى في الله يامسلمين الأرض شمروا لرمضان وإستعدوا له صوموا وصلوا وإقرءوا كتاب ربكم عاملوا الناس بالتى هي أحسن اتقوا الله في أنفسكم ونسأل الله جميعا أن يثبتنا على طاعته وأن يرزقنا الإخلاص في القول والعمل وكل عام وأنتم بخير…
