كبسولة مركزة للناس المهيسة رقم “٨” قرار رفع سعر الدواء يصب في مصلحة المواطن

 

بقلم / خالد الترامسي

اه متقلقوش دي زيادة بسيطة ومعقولة أيه يعني لما دواء كان ب ٣٠ جنية يبقي ب ٣٦ جنية مفيهاش أي مشكلة وعلي رأي الإنجليز “no problem ” مفيش مشكلة وبعدين يعني هو كان كل الدوا ب ٣٠ جنية مهو فيه ب ١٣ج و ١٠ج و ٣ ج و ٥٠ قرش مفيهاش أي مشكلة يعني شركات الأدوية تقفل يعني ، خلي دماغكوا كبيرة هو صحيح العشرة جنية بقت زي الربع جنية بس عادي دا حتي كدة كويس ، تخيلوا بقي القوة في الفشخرة لما تقول أنا صرفت ٣٠٠جنية دخلت كنتاكي كلت واجبة ، أو أشتريت ١٠ بيضات ب ١٥٠ جنية ولا لما تقول إشتريت ١٠ بيضات ب ٥ جنية، وإحنا شعب ما شاء الله يحب الفشخرة موت ، أنا عن نفسي لما أشتري قميص ولا تي شيرت أول ما أدخل عليهم ومن غير أساسا ما يسألوني ده بكام أقول لهم القميص دة ب ٢٧٠ج منهم عشرة جنية تيبس ، هو كدة طبيعتنا كدة ، فجت بقي علي الدوا ، عادي يا جماعة ، بس إللي بيضايقني التصريحات المستفزة ، لما يطلعلك ويقولك إن الزيادة تصب في صالح المواطن .

علي علم وأنا بكتب ليكوا المقال دة قاعد مع مراتي في كافيه في السراج مول تخيلوا دخلت علينا واحدة تري شيك ماسكة ٥ جنية أنا أعتقدت من بعيد إنها عوزة تفك ١٠٠ جنيه ، هميت أفك لها فوجئت إنها ٥ جنية قلتلها بطريقة عفوية ” هو حضرتك عايشة معانا ” طبعا الست وهي في العقد الستين من عمرها لاحظت إنها تضايقت من الكلمة فبادرتها معتذرا أني أقصد الهزار قلت لها هو الجنيه بقي له قيمة ، ردت علي قائلة ” فعلا يا أبني الدنيا إتقلت بركتها “.

عموما السادة المحترمين شايفين أية إن زيادة سعر الدواء يصب في مصلحة المواطن ، كما سلف وذكرت لكم ، هكذا ذهب الباشا المبجل المحترم أبن المحترمين روح أمه وعين خالته المتحدث الرسمي لمعالي السيد المحترم رئيس الوزراء ، طيب يا سيادة الباشا زيادة السعر دي مبتصبش في حاجة تانية ، يعني في جيب حد تاني ؟! طيب في درج حد تاني ؟! أصل في ناس مينفعش معاها الجيب الجيب ده بتاع الموظفين إللي علي أدهم ، أصل الجيب لو إتملا هيبقي شكلهم بايخ طيب تحت بلاطة حد تاني ؟! أصل للأسف الفلوس دي لازم تبقي تحت البلاطة يعني هي هتتحط في البنك ، يعني هي فعلا هتتحط فعلا تحت البلاطة خليك مدردح يا كبير هما أكيد هيشتروا بيها شقق لأقاربهم وياخدوا عليهم ورق ضد ، عادي يعني يعني هما هيسيبوا الفلوس مركونة لحد ما تنتن ولا الفران تاكولها أكيد هيستثمروها عشان تبيض ، والشقة تبقي عمارة والعمارة تبقي عماير وعمار بيت أبوك .

طيب الناس كدة هتفيص منكوا في السكة ، هما هيلحقوا علي زيادة البنزين ولا الكهربا ولا الميه ولا الرز ولا الباتون ساليه ولا البطاطة ، دا ذر البطاطا يا معالي المتحدث بقي ب ٢ جنيه ، يدوبك تقيسه بصباعك بس يا ريت يكون صباعك صغير .

علي علم يا سيادة معالي المتحدث الرسمي أنا سألت شريحة من الناس عشان أطمن وأشوف يمكن أنا مش عايش في البلد دي ولا يمكن قلبنا هنود ، قلت لواحد إن زيادة الأرز بيصب في صالحك بصلي بقرف وسابني ومشي إظاهر إعتقد إني مجنون ، سألت واحد تاني قلت له إن زيادة فواتير الكهربا بيصب في صالحك ، بصلي يا معالي الباشا وقالي أمشي ياد بدل ما أخنفك هي ناقصة عته علي الصبح ، أنا قلت بدل ما أطلع بعاهة ولا حاجة قلت أسأل واحدة ست أقله ضعيفة ومش معقول تفكر تضرب رجل ، قلت لها زيادة فاتورة المياه بتصب في صالحك ، ومرة واحدة لقيتها بعزم ما فيها وأصدرت صوت نغمة مينفعش أقولها وقالتلي ” بتتريق علي يا روح أمك مع الترنيمة الموسيقية بتاعة الشخ،،،،،،،،،،،،، والله يا معالي الباشا مع حاجات تانية ، أنا بقي شكي بصراحة كلوت مقطع ، إنت إللي حطيتني في المأزق دة يا كبير .

عموما يا كبير قلت قبل كدة أرفعوا ومش ضروري تستفذوا الناس هي مش ناقصة ،وبعدين هما كانوا قالوا لكوا حاجة لما رفعتوا البنزين والكهربا والغاز والمياه ، لازم تقول التصريح ده هي الناس دريانة بحاجة ، فوكك يا كبير بس أنا متغاظ يا كبير عشان الست الشرشوحة إللي سألتها وأصدرت الصوت إياه كانت من وسط راقي مش من الدويقة .

اخر المقالات

لي لي فؤاد بعد قرار حبسها.. تفاصيل فيديو الخادمة والمصحف
أخبار مصر
حمو المرشدي بعد فيديو تقبيل صديقه.. تفاصيل منعه من الغناء
أخبار مصر
مقالات واراء
مقالات واراء
الأدب و الأدباء
أخبار عالمية

منطقة المحررين