بقلم / خالد الترامسي

شوفوا بقي يا جماعة أنا قررت وأكيد طبعاً في ناس كتير هتعارضني في هذا الرأي ، بس ده عشان البلد تمشي وأظن إن أرباب الصحافة والإعلام عاوزين طبعاً الخير للبلد ، دي مصر أم الدنيا ، مش إحنا بنفديها بدمائنا وأرواحنا والقُلة إللي حليتنا ، عادي لما نحميها ونحط لازقة ومش طبية ومن النوع الرديئ علي أفواهنا .

طيب عشان موجعش دماغكوا المتكلفة ، كتب ومجلات وجرايد ودراسات إعلامية ، وخبرات مكتسبة وغيرها ، ندخل في الموضوع علي طول ، نقفل كل وسائل الإعلام المرئية والمسموعة والمقرؤه ، بس نسيب قنوات الأغاني ، وخاصة أغاني الهشك بشك ، وقنوات الأفلام ، وممكن نسيب كمان الكام مجلة بتوع المشاهير واللي كل شهر ولا أسبوع تطلع لنا مُزَة طحن ، والكلام ده هيبقي لمدة ثلاث سنوات لِما بعد الولاية الثانية للريس ، وطبعاً بالمرة نقابة الصحفيين تتجنزر ويا ريت الكام نقابة إللي دمهم تقيل يأخذوا حزو نقابة الصحفيين هتبقي حاجة جميلة وخلو الدولة تمشي وتلعلع والناس تعرف تظبط لنا البلد .

بصراحة هما كل ميجوا يخدوا خطوة إيجابية وتنعنش البلد وتخليها فِرِشْ بريحة النعناع ، تقعدوا تتنططوا زي فرقع لوز إنتوا مال أبوكوا بصنافير ولا تيران ، هي كانت جزر أبوكوا ولا الست ماما ، متتهدوا شوية ، هي العملية ناقصة ، طيب إنتوا هتفهموا أكتر منهم ، طيب إنتوا عندكوا معلومات أكتر منهم ، طيب انتوا بتحبوا البلد أكتر منهم ، طيب الواحد فيكوا عنده ٩٠ مليون عقل في الدماغ الواحدة زيهم ؟! ، أظن لا ، طيب يبقي إنتوا بتجادلوا في أيه ، هما بيفهموا عنكوا والواحد فيهم عندو ٩٠ مليون عقل وزيهم فشة ، وزيهم طحال ، وزيهم ممبار ، وزيهم رجلين، يبقي تسكتوا بقي بدل مهتلاقوا العين الحمرا والزرقا والسودة وكل الألوان الغامقة .

طيب إنتوا عندكوا ” داتا بيز ” هما عندهم ، هما شايفين الدنيا أكتر مننا ، طيب إنتي تعرف جارك أكل إيه إمبارح طيب شرب إيه ، عمل الواجب ولا معرفش ، طيب هما عارفين ، يا جماعة إنتوا ناس عندكوا إحساس ومشاعر وبتخافوا عالقطة لوزة والكلب مشموش ، هما معندهمش إحساس ، أقصد يعني الإحساس ده بتاع القطط ، عموما يا جماعة هو فيه أحسن من إن الواحد يفرغ دماغه من التفكير ويلقي ناس تفكر له ، دا حتي والله المفروض نكافئهم إنهم بيفكروا بدلا منا والله المفروض نلم لهم فلوس ، هو صحيح الدنيا متكحرتة ، بس هتتعدل إن شاء الله ، إدعوا كدة للريس ربنا يعينه علي المسؤولية ، دي تقيله ، مش كفاية إنه شايلها لواحده ولا انتوا عاوزينوا يفيص

يا جماعة إحمدوا ربنا إنكوا ماشيين في الشوارع أمنين ، ولا بقي في ّقنابل بيفجروها ،،،،،،،،، الإرهابيييييييييييين يعني ، وبتاكلوا وتشربوا ، ومش مشددين لكوا علي الوسائل المساعدة ، عاوزين إيه تاني ، عوزينهم يرجعوا تاني للي واللي واللي ، ما إحنا كدة زي الفل ، وبعدين الناس دي والله والله والله أحسن من غيرها ، ولا إنتوا عاوزين صلاح نصر يرجع لكوا تاني ، ولا يحطولكوا رقيب لِما قبل النشر ، كده أحسن والله ، سيبوكوا بقي من السياسة والتصدي لمشكلات المجتمع إللي هتودينا في داهية دي ، وعلي رأي المثل إللي بيقول ” الطيب أحسن “.

اخر المقالات

أخبار مصر
مقالات واراء
مقالات واراء
لي لي فؤاد بعد قرار حبسها.. تفاصيل فيديو الخادمة والمصحف
أخبار مصر
حمو المرشدي بعد فيديو تقبيل صديقه.. تفاصيل منعه من الغناء
أخبار مصر
مقالات واراء

منطقة المحررين