كتبت : نورا سمير طبيعي جدًا إن البنت تتخطب ..لكن اللي مش طبيعي وغير مألوف ومش عادى هي تصرفات البنات بعد الخطوبة.. وخاصة عالفيس بوك ومن أهم التصرفات دي اللي بتقعد تنصح بيها البنات بعض وتشيرها لبعض لما تتخطب هي كالآتي : 1- قبل الخطوبة بأسبوع كده اعملى felling happy بدون ذكر السبب.. وده طبعا لمزيد من جو الساسبنس والإثارة عشان كل الناس تسألك فرحانة ليه ياشابة ؟ وياريت ماتجاوبيش واكتفى بس بايموشن بيضحك. 2- وفى خلال الأسبوع ده اقعدى شيرى فى بوستات عاطفية على أغانى رومانسية وأخيرا انهى حالة الصمت وحطى صورة واحد بيلبس واحدة الدبلة “والحدق يفهم .” 3- وأهم حاجة فى الموضوع ده كله غيظى أصحابك. 4- فى يوم الخطوبة بقى اعملى مهرجان على الفيس بوك ..وأول ماحفلة الخطوبة تخلص وخطبيك يمشى اجرى على الفيس واعملى feeling loved..وطبعا غيرى حالتك من سينجل لengaged 5- وماتنسيش طبعا فى وسط الزحمة دى تغيظى أصحابك بشوية بوستات كده تفقع المرارة. 6- تانى يوم شيرى صورة فستان الخطوبة وجزمة الخطوبة وبوكيه الخطوبة وصورتك وانتى عند الكوافير ونزليها عالفيس لأنه ده إنجاز وطبعا ماتنسيش صورتك إنتى وخطيبك وإنتوا عاملين قلب بايديكوا وطبعا ركزى فى صورك على الإيد اللى فيها الدبل. 7- وماتنسيش تغيظى أصحابك. 8- خطيبك يزعلك اقلبى الفيس بوك على اللى فيه وانزلى بقى بالأغانى والبوستات الحزينة واعملىfeeling broken. 9- طبعا هايشوف البوستات ويجى بالليل يصالحك فاتروحى مغيرة حالتلك تانى لـhappy وماتنسيش تصورى صورة علبة البيتزا اللى خطيبك جابهالك عشان يصالحك بيها وطبعا هاتصوريها فاضية لأنك قضيتى عليها. 10-وبدون ماتعملى حاجة إضافية كفاية صورة علبة البيتزا واكتبى جمبها بس كانت “بستافت كراست ” عشان تغيظى أصحابك. 11- فاكريه بعيد ميلادك وياريت تفكريه برضه بالهدية ومش مشكلة إنك تفكريه إنه يعملك مفاجأه عشان بتحبى المفاجئات ..وفعلا يعملك مفاجأة ويجبلك تورته فى ستار باكس وصورى طبعا التورتة قبل ماحد يقطعها واكتبى إنك فى ستار باكس مع خطيبك وحطي صورة التورتة. 12- بليل بقى اكتبى شوية كلام حب فى خطيبك وإنه أجمل عيد ميلاد إتعملك وإنها كانت أحلى مفاجأة غير متوقعه “وربنا يسامحك على الكدبة دى ” وطبعا ماتنسيش تغيظى اصحابك. 13- ولما تقدموا شوية بقى ويبدأ مايردش عليكى اعملى feeling alone وشوية كلام كده من نظير ماحدش بينجرح أوى غير لما بيحب أوى فايروح مطنشك 14- فاتروحوا متخانقين فاغيظه بقى المرادى واعملى كومنت لأصحابك الولاد وتاج ليهم ..فاتتخانقوا اكتر. 15- فايفشكل الخطوبة نهائى. 16- اعمليله بلوك وحطى صورك تانى على الفيس وارجعى لحياتك تانى لحد ماتتخطبى تانى. 17- واعملى engaged تانى وبدل ماتغيظى أصحابك المرادى غيظى خطيبك الأولانى بصور خطيبك التانى وصورى صور الدبل وحفلة الخطوبة ولقحى عليه بالكلام انها كانت أيام سودة معاه وإنه كان مألحف وإنك إنتى اللى كنتى بتعزميه دايما لأنه ماكنش لاقى ياكل.. وانك صبرتى أخيرا واخدتى سيد سيده
