يابلد كل حاجه فيكي عكس بعضها أمشي لقدام ألقي نفسي ماشي لورا تايه أنا فيكي ولا أنتي الي متواهني فهمك ومش فهماني ولا فهماني ومش مريحاني تعبت من كتر الكلام و صوتي راح في أسمك بالهتاف وقلمي قدام الرصاص أتقصف وجف الحبر من برد الخوف وبهتت ألواني من مطر الدموع ضيعت ملامح صورتي و أسمي من سجلاتك أتشطب أه منك لما تخليني أرمي اللوم علي الزمن وكأن العيب بالوقت وباليوم وبالسنه وأقول بعلو صوتي اه منك يازامني تقوليلي خليك صديق الحيط تعيش بأمان رافع راية الجبن و بتقول عليها راية سلام دا السلام أحترام والسجود والركوع لله مش للعباد يا بشر
وأقول أيه أنا فيكي ومعاكي خلصت الكلام حب فيكي وحبيت و عتاب واتعتبنا لوم ولومنا و بالآخر لا اتصالحنا و لا اتخاصم يابلد زعلانه مني قوليلي علي راسي وبقلبي وجوه عيني شايلك أنا ليه جوه ترابك تشليني وعلي أرضك تسجنيني دا أنا الي ليكي لو حد فكر يعديكي دأنا الي روحي فدا ترابك من غير تمن ليه فيكي الي عايش وانا إلي حلمي مات قبل ما يتولد هو انتي امي ولا انا امي ماتت يابلد
