من أشعار : مصطفى معوض
- وما الدنيا إلا مسرح كبير
كلمه وقالها شكسبير
ولو فكرنا فيها هنلقى
بجد بتعني معنى خطير
جوه المسرح خدعه كبيره خدعه خطيره
أصل المسرح مبنى أساسه على التمثيل
كل الناس بتمثل دور غير الأصل بدون تفسير
خداع الناس بين الناس هو اساس جوه المسرح
لكن المسرح فيه القصه
وجوه القصه مليون خدعه من الملاعين
يقولولك أصل الشرير طيب
لكن الطيب ده شرير
شر وسايد جوه المسرح
واحنا كده قعدين ساكتين
لعنوا جدودنا وهادمو بيوتنا
وده كله فى مسرح دنيا كبير
لو هاتشوف كواليسه فى يوم
راح تتجن بدون تفكير
لازم نصرخ أو نتكلم
لازم نوقف الملاعين
بتقول نصبر ؟
ماإحنا بقالنا كتير صابرين
أصل الرعب معشش فينا
من أيام وشهور وسنين
ماانتاش عاوز تصرخ يوم
أو تتكلم عن ملعون
ولا الصمت أتمكن منك
وقطعوا لسانك بالسكين
أنا مش هانصح أو هتكلم
أصلى نصحتك ياما كتير
ولو هطنش كده وتبلم
هتحوم حواليك الشياطين
وهتفضل كده وسط المسرح
كبش فدا بين الملاعين
